Kòrsou ta risibí plaka di Union Europeo pa hasi 6 bario mas abitabel. Konvertí den moneda Antiano, ta trata di 25 mion florin pa konstrukshon di kas di pueblo i pa instalashon òf mehorashon di infrastruktura. Esei promé minister a bisa djaweps.

Segun planifikashon trabounan ta start na febrüari di otro aña, den e barionan Fòrtuna Ariba, Kortijn, Nieuw Nederland, Sapaté, Tera Kòrá i Wechi. E proyekto ku ta atendé ‘problemanan sosial i e koheshon sosial ku ta bai atras mas i mas, ta enserá asfaltamentu di kaya, ponementu di asera i kloaka, diseño di áreanan di rekreashon i instalashon di lus (di kaya).

Aserkamentu moderno
Tambe a kòrda riba konstrukshon di kas. Di un banda lo drecha kasnan eksistente, di otro banda ta bai traha kas nobo.

Den e aspekto akí, Wechi mester bira ko’i saka kara kuné. “Aki nos no ta djis bai hasi limpiesa i traha algun kas”, Schotte a deklará. “Aki nos ta bai apliká ideanan moderno: e infrastruktura lo bira optimal, por ehèmpel lo bini ‘water harvesting; kosecha di awa’. Esaki ke men ku nos lo no laga awa di shelu laba bai laman, pero nos lo kapt’é pa uzo bentahoso. Lo hasi uzo amplio di energia alternativo.

Bin Wechi bèk
“Na Wechi lo por mira bon kla kon nos ta traha na futuro dje pais akí. Nos lo no konstruí kas di un piso, sino kas di kuater te sinku piso. Lo tin bon kas disponibel – tambe pa yunan di tera ku ta regresá djafó.” Den e kaso akí Schotte ta referí na e proyekto ‘Bin kas bèk’ di partido di koalishon Pueblo Soberano.

E 25 mion florin pa e proyekto akí, segun Schotte tabata destiná pa konstrukshon di un di dos megapir. Gobièrnu Schotte sinembargo ta duna prioridat na e metanan den su Plan Nashonal pa Desaroyá Bario. Pa e ko’i saka kara kuné, ku ta Wechi, a reservá 10 mion florin Antiano.