Por papia di un berdadero plaga di sangura na Ref, di Banko di Seguro Sosial (SVB) pa Holiday Beach Hotel na Kòrsou. Gobièrnu ta kombatiendo e situashon ku insektisida, pero segun Yvette Raveneau di Amigu di Tera, esei ta un polítika di término korto.

E plaga ta bini debí na e awa sushi ku ta pará ketu na Ref. E organisashon di medio ambiente ta boga pa un solushon di término largu pa kore ku e sanguranan. Ken ku kana pasa banda di awa di Ref ta ripará nan presensia i sinti nan atake.

E awa tin ku sigui kore
Raveneau, ku ta presidente di Amigu di Tera, ta konstatá ku te asina leu no tin un solushon permanente pa e awa pará ketu na Ref. “E awa di Ref no ta sigui kore. El a bira un lugá ideal pa sangura brui.”

Apesar ku e nivel di salu di e awa ta haltu, sangura ta logra pone webu den dje sin niun problema. “E sanguranan akí ta hopi aktivo.” Segun Raveneau, no ta trata di e tipo di sangura ku ta transmití dengue, e asina yamá sangura tiger.

Awa di kloaka
Otro problema ta ku tin awa di kloaka ta bin para den e awa di Ref. Segun Raveneau, esei ta debí ku e ‘pomphuis’ no ta traha bon i e no ta manda e awa di kloaka na e planta di purifikashon di awa na Klein Hofje.

Mas di dies aña pasá a raspa fondo di e awa di Ref, pero el a bolbe tapa sera ku lodo. Raveneau: “Di mes, pasobra mester keda mantené e área i esei no ta sosodé. P’esei nos ta boga pa un bon plan di mantenshon pa e awa di Ref. Pa por hasi esei, mester bin un estudio di e área di Ref promé.”

Palu di mangel
Segun Amigu di Tera, e solushon di término korto ku ta aplikando aktualmente - spùit insektisida – ta malu pa naturalesa. “Tur hende ta konvensí ku e pal’i mangelnan tin ku keda. Pues, dèmpel e área no ta un opshon”, Raveneau ta bisa konvensí. “E área di e pal’i mangelnan ta yen di piská chikitu di koral, anto e insektisida ta malu pa nan. Nan tin ku pone webu, pero e insektisida ta mata nan.”

Segun Raveneau, e úniko manera pa kombatí e plaga di sangura na un manera efektivo ta di no duna nan chèns pa brui. “I pa logra esei tin ku laga e awa sigui kore. E úniko manera pa logra esei ta di keda mantené e área bon." P’esei mes Raveneau ta pensa ku, ya ku por lo pronto esei lo no sosodé, e plaga di sangura lo no disparsé pa awor.