Tantu e piloto, Divi Divi Air komo outoridatnan di aviashon na Kòrsou no ta sali liber di e aksidente aéreo fatal di buelo 014 dilanti di kosta di Boneiru. Tur esaki por konkluí for di e rapòrt di e Konseho di Investigashon, ku un aña i mei pasá a hasi investigashon na loke a kondusí na e aksidente i ku a presentá su resultadonan djamars último. 

E Konseho no ta konsiderá komo su tarea i enfátikamente e no ta indiká ningun kulpabel, pero for di e konklushonnan den e rapòrt ta sali bon na kla ku e karga di mas di e avion chikitu i e supervishon di tantu Divi Divi Air komo e outoridatnan di aviashon ta duna un imágen di konsternashon di seguridat aéreo na Kòrsou.   

Motor
E Konseho di Investigashon pa Seguridat no por a saka afó kiko tabata e kousa ku e motor na man drechi a kai afó. E investigashon tékniko a keda limitá dor di e situashon den kua e motor i e avion tabata.

E rapòrt ta papia di koroshon serio komo konsekuensia di e hecho ku e avion a keda mas ku dos luna na profundidat grandi den laman, promé ku a logra sak’é. 

Piloto
Despues ku ún di e motornan a kai afó, piloto  Robert Mansell, a kontinuá ku e buelo pa Boneiru. Dor di no bini bèk na e aeropuerto mas serka di su salida, aeropuerto di Hato, e no a skohe pa e ehekushon di buelo di mas sigur i tambe e ehekushon obligatorio, segun e Konseho di Investigashon. 

Ademas e piloto tabata na haltura, òf e mester tabata na haltura di peso di mas di e avion. Segun e Konseho Robert a sali ku 9% di peso di mas kompará ku, e peso maksimal struktural di lantamentu di buelo. 

Dor di kontinuá ku e buelo bou di e sirkunstansianan akí, kaminda e avion no por a mantené haltura komo konsekuensia di peso di mas, e piloto a tuma un riesgo inaseptabel, segun e rapòrt. 

Tambe den ehekushon di e buelo i preparashon pa un aterisahe di emergensia tampoko Robert a aktua, di akuerdo ku Konseho di Investigashon manera lo por a ferwagt di dje. E aterisahe a keda ehekutá sin ku e ‘flapnan’ a keda saká, dor di kua e avion tabatin un velosidat di aterisahe mas haltu.  

Despues di e fayo di e motor e piloto a tuma insufisiente intento pa informá e pasaheronan tokante un aterisahe di emergensia riba laman ku mester a sosodé próksimamente, dor di kua nan por a prepará nan mes insufisientemente. 

Divi Divi Air
E rapòrt ta devastador tokante e maneho di Divi Divi Air. Esaki strukturalmente lo tabata tene supervishon insufisiente riba e seguridat di entre otro e ehekushon di buelo ku e tipo di avion Britten-Norman Islanders, e avion ku tabata bula kuné. Dor di esaki tabatin insufisiente atenshon pa e riesgonan di peso di mas.

E peso maksimal struktural pa lanta buelo di 3000 kilo tabata keda uzá komo límite durante ehekushon di buelo. Den 32% di e buelonan investigá di Divi Divi e number akí a keda yená eksaktamente. 

Pa Konseho di Investigashon esaki ta un indikashon fuerte ku e pesonan notá pa ekipahe i kombustibel no tabata korekto i ku den realidat e peso maksimal struktural pa lanta buelo di 3000 kilo tabata keda surpasá. 

Den 62% di e buelonan investigá e peso maksimal struktural pa aterisahe  di 2850 kilo a keda surpasá. Konseho ta konkluí e ora ei tambe ku tabata karesé di e kòntròl interno riba e programa di karga serka Divi Divi.  

Gerensia di Aviashon
E èks Gerensia di Aviashon (aktualmente Curaçaose Luchtvaart Autoriteit (Outoridat di Aviashon di Kòrsou)) tabata tene supervishon i kòntròl insufisiente riba maneho operashonal di Divi Divi Air relashoná ku e pèrmit pa ehekushon di buelo ku e avionnan Britten-Norman Islanders ku tabatin den uzo.

Di e manera ei e servisio lo mester a konstatá ku tabatin diskrepansia entre e karchinan di instrukshon di seguridat i e salbabidanan di abordo. Despues di e aksidente ku a instituí e peso di pasahero promedio stándart di 80 kilo, ta brinda insufisiente siguridat, ku surpasamentu di e peso maksimal permití pa lanta buelo (ku e tipo di avion  akí) lo sosodé mas, di akuerdo ku e Konseho di Investigashon. 

Dunamentu di ayudo
E rapòrt no ta spar e batimentu di alarma i dunamentu di ayudo na Boneiru. Konseho di Investigashon ta konkluí ku tabatin un koordinashon limitá entre e diferente servisionan di duna ayudo dor di kua esakinan no a funshoná di manera optimal.

E asina yamá Commando Plaats Incident (CoPI) (Komando di lugá di Insidente), ku segun e plan di katástrofe di Boneiru mester a tuma e koordinashon di e servisionan di ayudo na Boneiru, no a keda formá.

Pa e funshonarionan dirigente, ku segun e plan di katástrofe pa isla di Boneiru i e plan pa kombatí katástrofe di aeropuerto tin un tarea den kombatimentu di katástrofe i aksidentenan serio, den pasado a organisá i evaluá insufisiente ehersisio multidisiplinario.  

Dor di esei nan tabata insufisientemente prepará pa nan tarea. Ademas e botonan di brantwer i esun di polis pa basta tempu no tabata funshonal.

Rekomendashonnan
E Konseho a duna un kantidat di rekomendashon na Divi Divi Air, Minister di Tráfiko, Komunikashon i Planifikashon Urbano, Charles Cooper i e sekretario di Estado hulandes di Infrastruktura i Medio Ambiente (mira kuadro) i gezaghebber di Boneiru, ku ta enkargá ku e mando superior di e organisashonnan di tarea i e dunamentu di ayudo.