For di siman pasá personal di Servisio di Seguridat di Gobièrnu (LBD) no por traha overtaim mas. Esaki ta pará den un karta ku maneho di LBD a manda pa personal. E instrukshon a bini di minister Elmer Wilsoe di Hustisia. Esaki Ronald Abraham, presidente di bònt di polis NAPB, ta konfirmá.

Motibu pa e paramentu di overtaim ta ku no tin plaka mas p’esaki. “For di fuente konfidenshal a bin sali ku e situashon finansiero di Kuerpo di Polis ta masha malu. Si no hasi nada”, Abraham ta pronostiká, “aki un luna i mei polis lo no tin sufisiente plaka mas pa kumpra gasolin.”

Peliger
A surpasá e bùdjèt di overtaim i awor tin chèns ku e koperashon entre SKS i VKC tambe lo para. E koperashon aki ta pa kombatí e oumento di kriminalidat. “Ku paramentu di e koperashon no solamente tin ménos patruya riba kaya sino tambe ta bira mas peligroso pa nos polisnan i nos no ta aseptá esaki”, segun Abraham.

Reunion
Mirando e urgensha e lidernan di sindikato di NAPB, SAP i ABVO awe atardi lo sinta na mesa ku minister Elmer Wilsoe di Hustisia. E bòntnan ke tende di minister kon e ta bai solushoná e situashon aktual di Kuerpo di Polis.