E proposishon nobo pa lei di impuesto ta enserá ku penshonado na islanan BES lo tin konsiderablemente ménos entrada. Asina Jopie Abraham di DP di Boneiru a bisa durante un kombèrsashon tokante Konferensha di Mesa Rondó ku komishon fiho di parlamento hulandes pa asuntunan antiano i rubiano, djárason 8 di sèptèmber.

En partikular hende ku tin AOW ku un penshun chikí lo mester bai entrega mashá. Awor aki e prima pa e penshun ta fihá riba 10%. E lei nobo di impuesto ta oument'é te 30%.  Parlamento hulandes mester aprobá e proposishion pa e lei nobo ainda.

Niun parlamentario hulandes no tabata na altura di e konsekuensia desbentahoso, pero segun Abraham, minister Jan Kees de Jager di Finansa a informá parlamento bon kla di esaki. 'Asta a inkluí tabèl ku ta mustra ku hende ku AOW lo haña ménos sèn, ' e polítiko boneriano di DP ta bisa. Ineke van Gent (GroenLinks) ke entregá un amienda pa evitá ku ta perhudiká e penshonadonan. E ta hasi un yamada tambe na De Jager pa informá bon kla ta ki efekto e lei di impuesto lo tin pa e diferente entradanan.

Skucha un entrevista na hulandes di Scarlet Windster ku Ineke van Gent

Kompetishon inhustu
Partido GroenLinks, SP i VVD ke entregá amienda pa laga empresanan paga impuesto pa e ganashi ku nan tin. Segun e proposishonnan pa kambio, hende ku entrada mas haltu tambe lo mester paga mas belásten. Di e forma akí e frakshonnan ke logra ku lei di impuesto ku ta konta na Sint Maarten i Kòrsou ta konta parsialmente tambe na islanan BES. Esaki ta pa evitá kompetishon inhustu entre di un banda islanan BES i di otro banda Kòrsou i Sint Maarten. Abraham no por bai di akuedo ku esei.

'Kòrsou i Sint Maarten lo mester paga pa outonomia. Kòrsou tin un areglo pa penshonado i tax holiday, nos no konosé esei. Dikon diripente nos mester introdusí impuesto riba ganashi?' Asina mes Abraham tin konfiansa ku parlamento a haña bastante informashon den e reunion pa introdusí e amiendanan adekuá den e lei nobo di impuesto. 

Prekupashon
Durante e reunion tabatin representante di tur e islanan BES presente, ke men fuera di Abraham tabatin diputado sabano Chris Johnson i diputado Roy Hooker di Sint Eustatius. Nan a pidi pa tene e reunion ku e komishon di parlamento. Ei nan a ekspresá nan prekupashon ku e amiendanan ku SP i VVD ke entregá pa lei di impuesto pa islanan BES. SP ke introdusí por ehèmpel un impuesto di ganashi di 15% pa evitá kompetishon inhustu ku paisnan nobo Kòrsou i Sint Maarten.

Scarlet Windster a entrevistá Jopie Abraham (DP) di Boneiru na papiamentu

Djaluna 13 di sèptèmber lo tene un reunion den parlamento hulandes tokante e proposishonnan di lei di impuesto pa islanan BES.