‘Ora bo ta kla p’e, pasa e saku riba bo kabes. Despues, habri e kranchi di helio poko poko.’ Un pelíkula instruktivo dje sikiater hulandes Boudewijn Chabot ta splika kon un hende por kometé suisidio k’un saku i dos tanki di helio. Métodonan di asistensia propio ta birando menos tabú.

E lèi hulandes di eutanasia ta eksistí dies aña kaba. E lèi ta permití suisidio bou di sierto kondishon, pero ainda tin un grupo di hende ku tin deseo di morto ku no ta pas den e kuadro legal; hendenan ku no ta sufri sin perspektiva. Pa nan a desaroyá métodonan mediante di pelíkulanan instruktivo.

Helio
Chabot tin añosnan okupá k’e tema di ‘eutanasia propio’. Banda di métodonan ku ta enserá k’un hende mester stòp di komo i bebe, òf uza un kombinashon di remedi, e sikiater a saka un pelíkula kaminda e ta duna un splikashon eksplísito tokante un otro manera ku tin pa hende por trese fin na nan bida. ‘Si bo inhalá helio puru, un momentu pa otro lo bo pèrdè konosementu i bo ta muri dies minüt despues. E kos aki ta zona angustioso, pero pa hendenan ku a yega na final di nan bida pa motibu di un enfermedat, òf pasobra nan ta bieu i nan ke tuma despedida di nan sernan kerí, esaki ta un manera seif di muri, rondoná di familiarnan.’

Muri di un manera humano i digno, esei t’e meta. Pero direktora dje Asosiashon Hulandes pa Terminashon di Bida Boluntario (NVVE). Petra de Jong, no ta haña e kos aki masha humano. ‘Ta ken lo ke muri den un saku? Ademas, e kos aki ta masha difísil pa ehekutá sin yudansa di otro hende. Mirando e echo ku na Hulanda ta kastigabel pa asistí ku suisidio, e kos aki t’un problema. Nos no ke eksponé nos miembronan di famia n’e kastigu aki.’

Ku insistensha, Chabot ta sugerí hendenan pa hasi e dos delaster aktonan – habrimentu dje tankinan di helio i pasamentu dje saku riba kabes – nan mes. Dje manera ei no lo por papia di asistensha durante suisidio. Pero NVVE ta keda para riba su punto ku e método di helio no ta ideal. De Jong: ‘Nos ta konsehá hende kon nan por tuma un kombinashon letal di remedi. Riba nos wèbsait nos ta ofresé un servisio di sosten ku ta splika e método.’

Hasie-bo-mes
Den kuadro dje siman di eutanasia, NVVE ta organisá ‘The End’ (E Final): e promé festival di sine na mundu ku ta dirigí na eutanasia. Einan tambe por mira kon un hende por trese fin na su bida su mes. Den e pelíkula ‘Medeleven’ por ehèmpel, ta filma un hòmber di 91 aña na Bélgika, ku ta pasa na diferente botika kolektando sufisiente remedi di moda ke por traha un kòktel letal. Despues ku su señora a fayesé, el a fada di biba, pero e no ta bini na konsiderashon pa eutanasia. E pelíkula ta mustra e alivio dje hòmber na momentu k’e tin e kombinashon mortal den man: e tin e direkshon di su morto den su propio mannan.

De Jong ta hasi e remarke ku e tabú riba morto a bira menos fo’i dia k’a bini k’e lèi di eutanasia. ‘Ta un tema ku a para bira parti di bida. Konsekuensia djesaki ta ku hende a haña hopi gana di ta den kòntròl. Mi ta mira e métodonan di asistensia propio bini al kaso mas i mas.’

Pakus di fiesta
Profesor di étika di salubridat na Erasmus Medisch Centrum Rotterdam, Inez Beaufort, tambe ta nota esaki. ´Rònt mundu tin hende ku deseo di morto, pero esaki hopi biaha ta sosodé klandestinamente. Un investigashon na Inglatera a mustra ku gran parti dje poblashon ke tin e posibilidat pa por terminá nan bida, pero ku dòkternan ta kontra.’ Segun Beaufort, e método di helio di Chabot ta duna hende klaridat pa loke ta trata e posibilidatnan ku nan tin. Mas pelíkula instruktivo, mas mihó. ‘Pero ta parsemi fastioso sí p’e pakusnan di fiesta ku ta hür e tankinan di helio aki.’

For di un turno liber a sali na kla ku e pakusnan di fiesta aki no ta haña e kos fèrfelu pa nada. Un bendedó den un pakus na Amsterdam: ‘Mi no tin niun idea kiko mi lo hasi si mi hañami k’un señora di edat na kaha. Ta di laga hür e tanki numa, mi ta kere. E úniko kos fèrfelu ta ku otro hende no por supla blas mas.´ Pero e no ta mira e senario aki tuma lugá asina lihé. ´Un tanki asina ta muchu pisá pa bieunan.´