Patrimonio kultural di Boneiru ta sigurá pa futuro awor ku Hulanda ta dispuesto pa yuda e isla digitalisá e archivo grandi di periodista i produktor Boy Antoin, konosí entre otro di e programa ‘Herensia’.

E siman akí Boy Antoin a bishitá bários instansha hulandes pa wak si nan por yud’é pa salbaguardiá material balioso ku hopi biaha ta grabá riba teip òf kasèt ku awendia no ta uza mas. Instituto Beeld en Geluid na Hilversum a mustra interes den e material di Boy Antoin. “E material ku mi tin ta kuadra ku nan filosofia di warda historia oral pa futuro.’
 
Den futuro Boy Antoin ta bai manda parti di su material pa e instituto. ‘Idea ta pa nan digitalis’é, un kopia ta keda na Hulanda i un kopia ta bai bèk pa Boneiru.’ Den e material tin basta entrevista ku hende grandi di setenta i piku aña. Nan ta papia tokante nan bida i kustumbernan di ántes. Tambe 'di kustumbernan ku a bai pèrdí porehèmpel kon ta traha zeta di koko, dushi di tamarein.'

Aktualmente gobièrnu di Boneiru ta trahando un plan pa konservashon di patrimonio kultural di e isla. Durante selebrashon di dia di Boneiru lo presentá e plan den su vershon definitivo na pueblo boneriano.