Kaida di gobièrnu hulandes por tin konsekuensha pa e proseso di desmantelashon di Antia planiá pa 10 di òktober próksimo. E siman akí lo bira kla si parlamentu hulandes ta stipulá ku tratamentu di e leinan nesesario pa e proseso di desmantelashon ta bira un tópiko kontroversial. Si esaki ta e kaso anto e ora ei ta un parlamentu nobo so por trata e leinan.
 
Awor ku gabinete Balkenende ta demisionario mester tene kuenta ku desmantelashon di Antia riba e fecha 10-10-10 lo no ta alkansabel mas. Pa e proseso por finalisá riba e fecha akí mester trata e asina yamá leinan di BES i tambe e leinan di Reino (Consensus Rijkswetten red.) den e diferente parlamentunan, kuminsando den Tweede Kamer. E siman aki parlamentu hulandes lo mester disidí si ta trata e leinan akí si of nò.

Parlamentu por disidí ku tratamentu di e leinan ta kontroversial i ku ta p'esei no por trata nan awor ku gabinete ta demisionario, aún mas teniendo kuenta ku e diskushonnan pisá ku tabatin kaba te awor kaba den Tweede Kamer riba e leinan konserní. Asina parlamentu ulandes ta haña ku e leinan no ta bon hinká den otro i ku St. Maarten ahinda no ta kla pa bira pais outónomo den Reino.

Segun Bas Jan van Bochove, bosero di CDA den e komishon fiho pa asuntunan di Reino, e partido di koalishon mas grandi aworaki a bisa den deklarashon pa Wereldomroep ku mester tene kuenta ku no ta bai trata e leinan akí mas p'awóraki. Ronald van Raak di SP, e partido di oposishon mas grandi tambe a uza palabranan similar.