Yunan di Kòrsou ku ta biba na Hulanda ta mashá konserní ku nan isla natal. Por mira esaki n’e salanan ful k’e delegashon di Staten ta trèk. E siman akí, e parlamentarionan ta na Hulanda den kuadro dje projekto ‘Parlamentu den Bario’. Despues dje reunionnan den barionan na Kòrsou, aworaki e komunidat kurasoleño na Hulanda a yega na bùrt.

Den su introdukshon, presidente di Staten Ivar Asjes a hasi menshon dje krítika ku tabatin na Kòrsou rib’e biahe, entre otro dje partido di oposishon PAR. Segun Asjes, e salanan yen ta komprobá k’e bishita ta na lugá. Durant’e reunion, Asjes a sigui ku splikashon dje maneho di remigrashon dje gobièrnu kurasoleño aktual.

Eindhoven
Djarason anochi, despues di Den Haag i Groningen, Eindhoven tabata na bùrt. Despues dje introdukshon di presidente di Staten Ivar Asjes, i dje parlamentarionan Monique Koeyers-Felida (MFK), Eunice Eisden (MAN), Helmin Wiels (PS) i Humphrey Davelaar (PNP), presentenan tabata por hasi pregunta.
Na Eindhoven, e miembronan di Staten a haña hopi pregunta tokante, por ehèmpel, e relashon ku Hulanda i e posibilidatnan pa remigrá. Diferente hende ke bai bèk nan isla sí, pero ta ferwagt ku no tin bibienda ni trabou. Ivar Asjes a atmití ku efektivamente mester bini ku maneho p’esaki.

Atake severo
Durante dje reunion, miembro di Staten Helmin Wiels, lider dje partido di koalishon, Pueblo Soberano, a ataká Hulanda severamente. Esaki a pone públiko puntra kon ta weta yunan di Kòrsou ku a biba hopi tempu na Hulanda. Wiels ta hañ’e influensha dje gobièrnu hulandes na Kòrsou muchu grandi. Pero el a bisa interesadonan ku e no tin nada kontra hulandesnan.
Wiels a sigui elaborá riba e diferenshanan entre blanku ku pretu ku, segun e, a sòru p’e echo ku e kurasoleñonan berdadero nunka no a logra desaroyá nan mes.

Komprenshon
Apesar ku e hendenan den públiko no a kontradesí Wiels públikamente, tabata evidente si ku no tur tabata ens ku su pronunsiamentunan. Pero segun un dje interesadonan, su relato en todo kaso si a sòru pa komprenshon pa su manera di pensa.