Parada di Kabai, tradishonalmente e promé marcha di karnaval na Kòrsou a keinta públiko pa e paradanan ku ta sigui den e temporada di karnaval 2012. Un desfile kolorido di kabai, ginete i karosa a pasa den kayanan di Otrobanda ku hopi alegria.

E parada tabata poko mas kòrtiku sí ku añanan anterior. Segun un partisipante algun grupo a bisa ku nan no por a bini. E biaha aki tabatin algun desena di kabai den e òptògt, kaminda aña pasá tabatin mas ku shen. E desfile a sali for di Ref na Otrobanda i a kaba na Jan Noorduynweg.

Temanan
E gruponan ku a partisipá tabata bistí na trahe di kolo hopi bibu, yen di gleter i adorno. E promé grupo, Criadero el Hijo de David, tabata na bèrdè ku blanku dòrná ku flor i blachi. E kabainan tambe aki aya tabatin adorno bèrdè den nan klina i rabu. E tema tabata Mother Nature. “Nos ke honrá naturalesa pasobra kontínuamente ta lastimá esaki ku shushamentu di medio ambiente”, un amazona di Criadero el Hijo de David a bisa.

E grupo di karnaval ‘Kurason Yen Zjeitu’ a bai bistí na hepi. No ta e ginetenan so tabata disfrasá sino e kabainan tambe tabatin un paña bunita lila i hel drapiá riba nan lomba.

Famia Luyando di Bonam pa añanan kaba ta partisipá na e Parada di Kabai. Ántes nan tabatin hopi aña ta para kant’i kaminda disfrasá pa wak karnaval. Pero Jamell Luyando tin mei binti kabai na su Rancho Criadero Sofia. Riba un bon dia na febrüari a disidí ku na lugá di para wak so, bai partisipá na e karnaval di kabai i famia Luyando awó komo ‘Kurason Yen Zjeitu’ ta forma un parti fiho di e evento aki.

Luyando: “E aña aki nos ta partisipá ku ménos kabai. Nos mester a skohe entre un vakashon ku henter famia òf Parada di Kabai. E plaka di spar e aña aki nos ta usa pa bai pasa un vakashon grandi nos tur huntu na Toronto i New York.”

Hari
E Parada di Kabai e aña aki atrobe tabata konosé algun momento di hari. Kabai kaprichoso i nervioso no ker a sigui instrukshon di nan ginete. Algun kabai a bira kore limpi bai den direkshon kontrali. Tambe tabatin ginete ku por a mira na nan kara ku nan no sa kore kabai regularmente. Tabatin diferente amazona ku sapatu ku hilchi di stilèto sinta poko inkómodo den na sia.

E próksimo optògt ta e Parada di Mucha dia 12 di febrüari. Despues ta sigui Parada di Tiner dia 17 di febrüari i Gran Marcha dia 19 di febrüari.