Kolebra boa tin Kòrsou arib’abou dos siman kaba. Despues ku a deskubrí dos di e kolebranan ku ta choka ta teme pa sirkunstanshanan Arubano Ei ta kue sentenar di boa pa aña. Den parlamentu di Kòrsou a hasi pregunta kaba na minister di Naturalesa i Medio Ambiente.

Stanley Ignacio gusta traha ku bestia. Pa kada kalamidat ku bestia ta yam’é. El a yuda kue un di e boanan ku a haña na Kòrsou. E bestia morto ta den frizer di Parke Tropikal pa despues prepar’é.

Presa
Den parke tropikal tin kuater kolebra ku ta choka: tres python i un boa constrictor. Nan kurpanan ta lorá den otro den un kouchi. Ignacio: “Kolebra ta bestia masha trankil. Ta te ora nan tin hamber nan ta kuminsá move. Nan ta bai buska presa. I e ora ei en berdat nan por aparasé den bo kurá”.

No opstante e palabranan pa trankilisá di Dierenbescherming i di Stanley Ignacio, último simannan hende tin miedu tòg, awó ku a haña dos boa. Espesialmente na Band’Ariba kaminda tin ménos hende ta biba i ku tin hopi mondi ta rondoná e barionan, hende ta move ku kuidou. Na West Groot Sint Joris un señora ta sinta trankil riba su pòrch mientras ku bientu ta pone su korant waya. “Naturalmente mi ke bisa algu di e boanan aki! Ami tin miedu di nan. Mi ta biba pegá ku mondi i ta djei nan ta sali. Kiko mester sosodé? Buska nan anto mata nan!”

Ilegal
Probablemente ta venesolano a trese e boanan Korsou , Stanley Ignacio ta bisa. “A importá nan den un tempu ku ker a kria boa na Kòrsou. E venesolanonan a trese nan ilegalmente. Despues di tempu e kolebra ta hui òf ta laga nan bai den mondi.”
Un habitante di Band’Ariba ku ta traha den krio di mata, ta pensa ku ta trese boa Kòrsou sin intenshon ora importá mata. “E ora ei nan ta den e kònteiner di mata. Ma no tin nodi di tin miedu di nan. Boa no ta ataka.

Ignasio ta enfatisá ku no tin nodi di tin miedu di kolebra na Kòrsou. Ounke ku a mira mas kolebra riba e isla, nan ta plamá. No ta ferwagt situashon manera na Aruba, pasobra einan e situashon ta kompletamente otro Ignacio ta bisa. “Na Aruba en berdat tin hopi molester di boa paso a bini hopi webu di boa den santu ku a importa for di Sürnam. E santu a keda den un bario i einan e boanan a brui.

Ora señalá un boa por yama Ignacio, dierenbescherming òf hardin zoologiko. Ora kue boa por pone nan den hardin zoológiko, einan tin sufisiente espasio pa mas di nan.