Parada: ‘Oumento alarmante di diabetes na Kòrsou’

Awe nos Parada ta na Sentro di Bario Bonam na Kòrsou. Riba nos isla diabetes (suku) ta oumentando di un forma alarmante, Sokudi, e Sosiedat Kurasoleño pa Diabetes, ta bisa. Segun Sokudi 1 den 5 yu di Kòrsou tin diabetes. Sokudi ta bai den bario pa tèst sanger i duna informashon.

Ernest ‘Kèkè’ Willems riba diabetes

E konosido produktor di radio, músiko i kantante na Kòrsou ta duna konseho tokante di suku. “Lo mi konsehá tur hende pa de bes en kuando kontrolá nan suku. Asina bo sa si bo tin suku òf nò. Ami tabatin diabetes, awor no mas. Ta pa motibu di mi peso. Mi tabata pisa 152 kilo, awor mi ta pisa apenas 95 kilo. Esaki a kontribuí na e solushon di mi problema: awor mi por bisa ku mi no ta pashènt di suku mas”.

Pa sa si un hende tin suku mester tèst sanger, mayoria be un prek den dede. E kantidat di suku ku midi na yuna, mester ta entre 70 i 105 porshento di miligram. Seka un hende ku a prek sin yuna e nivel mester ta entre 105 i 140 porshento di miligram. Ora tin diabetes e kurpa no por regulá e nivel di suku den sanger bon mas. E suku ta haltu pasobra e kurpa ta traha insufisiente insulina, of no ta trah’e mes, pa regulá e suku den sanger bon.

Síntoma ku por indiká diabetes entre otro ta: set frekuente i oriná hopi, kansa, kimamentu di wowo òf mira malu, falta di rosea, doló den pia ora di kana i infekshon ku ta rekurí hopi manera infekshon di blas. E ora ei ta rekomendabel pa bai dòkter pa un tèst di sanger.

‘Bai den bario’
Pa konsientisá pueblo di suku, Sokudi ta bai den bario pa duna mas informashon na pueblo. Helen Molina, enfermera di diabetes i miembro di direktiva di Sokudi ta haña ku tur hende mester ta bon informá tokante e enfermedat Diabetes Mellitus i su konsekuenshanan. “Oumento di diabetes na Kòrsou ta alarmante. Den un populashon di algu mas ku 150 mil hende, trinta mil tin e diagnósis diabetes. Bo por bisa un den kada sinku persona.” Den e sifranan aki asta no a tene kuenta ku e grupo ku nèt no tin diabetes i esnan ku por heredá e enfermedat. Molina: Aki 5 pa 10 aña e kantidat di hende ku tin diabetes a bira dòbel.”

Estilo di biba
E manera ku bo ta biba tin influensha grandi riba diabetes. Segun Molina na Kòrsou awor sí mester tuma medida drástiko pa kambia e estilo di biba, i biba mas salú. “Nos ta hende sosial i nos gusta kompania i kome dushi. Esaki ta stimulá otro. Ma nos mester kambia nos pensamentu tokante kuminda. Riba kaya na Kòrsou bo ta mira hopi hende gordo. Ta pasobra nan no ta drecha kuminda salú pa nan komé.”

Na Kòrsou ta kome muchu karbohidrato. Esaki ta lanta enfermedat di suku, Molina ta bisa. “Nos ta kome aros ku batata hasá un banda anto banana hasá aseka tambe. Tur ta karbohidrato. Nos mester stimulá otro pa kome mas berdura bèrdè.

Parada tokante diabétis