Dia 20 di mart Papa Benedikto XVI den un karta pastoral na kreyentenan na Irlandia ta skibi ku e ta di shòk ku e abusu seksual ku a tuma lugá. Tambe e manera ku Iglesia Katóliko a trata e asuntu ta spant'é. 'Meskos ku e víktimanan, mi ta sintími traishoná pa e padernan i obisponan. E kulpabelnan mester responsabilisá nan mes dilanti Dios i wes.

Ounke ku e ta dirigí na kreyentenan irlandes, e karta ku a sali awe meinta ta e kontesta hopi sperá riba e skandal rònt di abusu seksual ku ta birando dia pa dia mas grandi den Iglesia Katóliko. Diariamente kaso nobo ta sali di klérigo ku tabata abusá di mucha den nan parokia. Na Hulanda Wereldomroep i NRC Handelsblad a saka kasonan di abusu na kla.
 

Awor ku na Alemania, Hulanda, Belgika, Brazil i Sürnam mas i mas kaso di abusu seksual di klérigonan ta saliendo na kla, iglesia no por keda tapa e asuntu. Den su karta djawe su santidat Papa Benedikto XVI ta atmití ku interesnan di Misa Katóliko tabatin mas peso ku interes di e víktimanan. E ta kulpa e obispunan di Irlanda ku nan no a apliká lèinan kanóniko na un manera drechi.
 

Mònseñùr Scicluna, kende ta un tipo di fiskal di korte di Asiento Sagrado, ta respaldá Papa den un entrevista ku Avvenire, e korant di e konferensha di obispu. 'For di aña 1922 tin un lèi di misa ku ta kondená e práktikanan aki'. Pero den e mes entrevista Scicluna ta trata di moderá e abusu seksual dor di hasi un distinshon entre aktonan seksual ku mucha bou di 12 aña, entre 12 i 16 aña i ku hóben mayor di 16 aña.
 

Esaki ta zeta riba kandela di e kantidat di krítikonan ku ta papia di un lèi di silensio klériko; di tur manera mester a evitá pèrdèment'i kara di Iglesia Katóliko. Ta lubidá un detaye chikitu den esaki: e kantidat di víktima ku a keda heridá pa restu di nan bida.
 

Ta remarkabel kon tiki kaso ta konosí na Italia mes. Den e pais ku kasi 50.000 pader te awo tin solamente 80 kaso konosí di abusu seksual.
 

Den si karta djawe Papa di Roma a enfatisá ku a apliká e reglanan di Iglesia Katóliko malu. E ta skibi ku e ta sinti su mes traishoná pa e padernan i obispunan i e ta añadí ku e kulpabelnan mester responsabilisá nan mes dilanti Dios i wes. Asina sin duda e ta spera di para e daño pa nòmber i kara di Iglesia Katóliko.