Djamars 18 di òktober e presidentenan di frakshonnan parlamentario ulandes a hiba un bishita di trabou na pais Kòrsou. Aya nan a reuní ku nan koleganan kurasoleño. Nan a urgi Staten di Kòrsou pa ainda inisiá un investigashon profundo riba informe di korupshon i falta di integridat den seno di gobièrnu Schotte. E ulandesnan por bien lubidá un reakshon positivo. Sí t'asina ku e temor pa un konfrontashon feros entre e parlamentunan tabata infundá.

"Boso tin ku dal e siguiente paso", asina vários lider di frakshon, di bishita na Kòrsou, a bisa basá riba konklushonnan  den e rapòrt di komishon Rosenmöller. Den dje tin pará ku integridat di promé minister Schotte i di su ministernan Abdul Nasser el Hakim (Desaroyo Ekonómiko) i George 'Jorge' Jamaloodin (Finansa) ta dudoso. Siman pasá parlamentu di Kòrsou ya a deskartá e rapòrt, bisando ku ta kos di benta den ko'i shushi.

Respaldo di institushon
Eunice Eisden, lider di frakshon di MAN ta respaldá desishon di parlamentu di Kòrsou enkuanto rapòrt di Rosenmöller i ta keda para ariba ku screening di mandatario ta tras di lomba. Eisden no por kaba di komprondé ku 'parlamentarionan di Hulanda ta pretendé di bin mustra Staten kiko i kon e tin ku atendé ku su asuntunan.'

Den e enkuentro el a trese dilanti, ku na Kòrsou tambe ta balorá i apresiá integridat i ku institushonnan manera Ministerio Públiko i Staten, i ku ni gobernador no a mira ningun motibu pa deklará ún òf mas kandidato komo no-ministeriabel. Eisden: "Ademas: si bolbe investigá minister esaki ta nifiká ku nos ta pone nos institushonnan un banda, algo ku nos no ta dispuesto na hasi: nos ta respaldá nos institushonnan", segun Eisden, bisando mas aleu ku dokumento dje komishon ta nada mas ku un 'rapòrt yen di redu', kaminda a reklutá kuarenta persona anónimo pa konta nan vershon.

Lidernan dje frakshonnan ulandes ta kere ku partnernan di Reino por duna otro ehèmpel mashá bon ku asuntunan  manera bon gobernashon i integridat. "Señora por ta haña ku nos no ta mió, pero si bo ta ta bisa ku nos mester wak nos mes, esei ta konta pa señora mes tambe", asina Job Cohen (PvdA) a kontestá Eisden.

Reunion komun i koriente
"Nos a reuní di forma habrí i onesto, pues e reunion a bai nòrmal", asina Gerdi Verbeet, presidente di Tweede Kamer a konkluí. Su kolega Ivar Asjes, ku a dirihí e reunion, a trese dilanti ku e 'no a tende nada straño' dje presidentenan di frakshon di bishita na Kòrsou.

No opstante por a ripará un diferensha bon kla entre papiá dje dos partidonan di interes. Di nan parti, e polítikonan wespet a floria nan diskurso bisando kadabé ku pa nan 'ta un gran onor' pa reuní ku parlamentu di Kòrsou i ku esaki ta 'un enkuentro istóriko', komo ku ta un aña di eksistensia so outonomia dje pais nobo tin.

Seguidamente e ulandesnan oropeo a duna di konosé ku 'resultadonan palpabel pa e siudadano' (Alexander Pechtold, D66), 'kompartí e mes afán den kolborashon ku otro' (Jolande Sap, GroenLinks) i transparensha riba terenu di integridat ta kondishonnan pa futuro pinta bunita pa Reino ulandes. Hulanda i Kòrsou mester traha riba nan matrimonio, segun Kees van der Staay (SGP). "Bo tin di derechi di hasi fout, basta bo siña di dje."

"Nos futuro por ta asta bunita mes si nos kampeonnan mundial di beisbòl gana oro otro aña na Weganan Olímpiko", asina Sybrand van Haersma Buma (CDA) a remarká. Lástimamente a skrap beisbòl komo disiplina olímpiko pa 2012 i 2016.

Ningun futuro
E polítikonan kurasoleño a preferá di no uza frase di etiketa. Nan a enfatisá - ku eksepshon di Emily de Jongh-Elhage (PAR) - ku e pais nobo no tin futuro den Reino ku e aktitut ulandes di awendia. "Nos no ta sinti nos bon biní den Reino", asina Dean Rozier (MFK) a bisa. De Jongh-Elhage ta wak e asuntu n'un manera diferente. E èks promé minister ta mustra rib'e echo ku gobièrnu di Kòrsou mes a pidi p'e investigashon di Rosenmöller. Awor a surgi deskonfiansa: "E kos ei no ta bon pa pueblo, ta señor Schotte por ke ku nos ta den e situashon akí."

"Nunka no tabatin un relashon na drechi ku Hulanda; ni tempu di Antia ni awó. For di tempu di kolonialismo tabatin protesta kontra Hulanda. Statüt a marka diskriminashon i Apartheid den Reino. Nada lo no kambia, es mas: pió so e kos lo bira, pues e mió manera ta pa nos bai for di otro ku tur rèspèt", segun Helmin Wiels (PS). Aki dies aña e ke biba na un Kòrsou independiente, pasó un futuro den Reino ta nifiká pa definishon 'un relashon di diskrepansha'. Wiels ke hasi algu sí ku rapòrt Rosenmöller, pero ku 'nos mes reglanan, sin 'e réplika putrefakto ulandes.'

"Enbes di pone atenshon riba intervenshon i kambionan di Statüt, mester atendé ku enseñansa i desaroyo sosial", segun Humphrey Davelaar (PNP). "E barku yamá Kòrsou, ku a lanta anker pa nabegá, no ta na benta", asina Anthony Godett (FOL) a deklará.

Lei di Tráfiko di Persona
Stef Blok, presidente di frakshon di VVD a trese otro punto delikado dilanti. "Hulanda mester por pone kondishon na imigrantenan ku ta bin di Kòrsou." Mester adaptá e lei di Tráfiko di Persona, pa hende ku bèkgrount kriminal no bin Hulanda. E proposishon akí no a kai den bon tera, pero Blok a kòrda sala ku Kòrsou tampoko no ta laga tur hende di otro parti di Reino drenta.