Otro aña sigur sigur lo bolbe tene TEDx Youth Curaçao, e foro pa kompartí konosementu ku tabatin ayera na Kura Hulanda. Asina su ko-organisadó Yannick Ersilia a duna di konosé.

“El a bira un atardi úniko. Tur hende a keda impreshoná di mira kon inteligente i kreativo algun di nos hóbennan aki na Kòrsou ta.” Despues di e edishon di adulto ku tabatin na desèmber 2011, ayera Ersilia a un di e organisadonan di un vershon hubenil di e foro di konosementu sumamente popular konosí komo TEDx. “El a bai asina bon ku for di awor mi por bisa ku otro aña sigur sigur lo bolbe tene un Tedx Youth, probablemente na novèmber.”

Ideanan inspirador
TED ta un foro ‘non-profit’ ku ta purba difundí ideanan úniko, inspirador i balioso rònt mundu pa medio di diskurso i presentashon, bou di e lema: 'Ideas worth spreading'. Aunke originalmente TED tabata dirigí riba Teknologia, Entretenementu i Diseño, awendia ya su áreanan di interes a bira mas amplio.

Riba enkargo di Jacob Geld Dekker, kende a intrdodusí TEDx na Kòrsou, Suhail Gomez a organisá e prome edishon di TEDx Kòrsou e aña akí. Durante e evento, nuebe hóben di Kòrsou i tres di St.-Maarten a duna un ‘TEDtalk’. Unu di nan tabata Kevin Osepa (17). El a tene un presentashon riba e tema di persepshon di realidat. “M’a splika ku kada ken tin su propio persepshon di realidat i su mes manera di pensa, i m’a purba di mustra esei ku dos pelíkula kòrtiku ku mi mes a traha.”

Otro kuenta
Den e lunanan promé ku TEDx, e hóbennan a risibí preparashon spesial tur djasabra. “Vários profeshonal a siña nos, entre otro, kon tene atenshon di bo públiko i kon hinka un bon presentashon den otro. Ke men, nos a siña e teoria bon. Pero realidat tabata un otro kuenta sí.”

E kos ta ku a bende práktikamente tur karchi pa TEDx Youth. Pues, Kevin a hasi su presentashon dilanti di mas di 150 hende. “Mi tabata hopi nèrvioso. Mi tabatin miedu di lubidá ki mi tin ku bisa.” Asina e hóben fotógrafo, ku na sèptèmber ta bai studia fotografia na HKU di Utrecht, ta konta. “Pero ménos mal, asina m’a kuminsá mi a ripará ku e públiko tabata haña mi presentashon hopi interesante, i na un dado momento m’a asta kuminsá improvisá un tiki.”

Mas TEDx den futuro
Banda di e di dos edishon hubenil anunsiá pa novèmber 2013, lo tin un di dos edishon di adulto tambe. “Un fecha konkreto nos no tin p’e ainda”, Ersilia ta splika. “Pero ku ta bin un evento nobo, esei ta sigur. Ademas, banda di e TEDx general, podisé nos lo organisá un vershon spesial pa hóben profeshonal i otro TEDx-eventonan tokante otro topiko.”