Parlamentario Cynthia Ortega Martijn (ChristenUnie) ta kontentu ku te 30 di yüni awor por bolbe kambia florin antiano na Hulanda, e ke mas tempu sí i mas lugá pa kambia moneda antiano. 'E periodo ta muchu kòrtiku', asina e parlamentario ta bisa. Despues di desmantelashon di Antia, banko i ofisina di kambio na Hulanda no kier a kambia florin antiano mas. Djei Ortega Martijn a entregá un moshon den parlamento hulandes pa bini ku un areglo provisorio.

E parlamentario ta lamentá ku na su opinion no a informá hende di e areglo provisorio. 'Den e debate mi a pidi pa bini ku informashon pa informá e hendenan.' 'Si bo no bin ku informashon, aweró bo ta haña bo ku siudadano ku no sa ku ta durante seis luna so por kambia e sèn.' E periodo ta vense nèt promé ku vakansi di berano ta kuminsá. Dikon no por a laga e dura te ora vakansi kaba, asina e parlamentario ta puntra.

Tur banko di ABN AMRO
Awor por kambia plaka antiano na GWK esta Grens Wissel Kantoren na Hulanda. 'M'a komprondé ku aworaki Banko Sentral di Hulanda ta deliberando ku ABN AMRO na Schiphol pa asina hende por kambia florin antiano ei tambe.' Ma esei no ta sufisiente p'e. 'Dikon ta deliberá ku Schiphol so?' Si ta p'e mester por kambia florin antiano na tur banko di ABN AMRO rònt Hulanda.