Na Sint Maarten gobièrnu i pueblo ta preparando pa yegada di orkan Earl. Gobièrnu a dekretá un toke de keda. For di ayera nochi diesdos or ora lokal niun hende no tin pèrmit pa subi kaya sin motibu urgente.

Ofisina i skol será
Na Saba i Statia tambe a tuma diferente medida di prekoushon. Tur skol i ofisina ta será awe. Segun Hurricane Center merikano orkan Earl lo pasa St. Maarten awe mainta 8or ora lokal algun kilometer nort di e isla. Den transkurso djawe orkan Earl tin e potensia di krese bira un orkan tipo 2. E sentro di orkan merikano ta kere ku Earl lo por siguí krese i bira mas fuerte, tipo 4 òf 5 ora e pasa Puerto Rico mayan.

Tur buelo kanselá
Ayera a kanselá tur buelo na Islariba despues di sink'or di atardi. A sera tambe sierto kaminda ku peliger di inundashon. A konsehá habitantenan pa saka tur kos for di kurá manera stul i mesa, i partidonan polítiko pa kita bòrchi di propaganda. Esaki pa evitá ku ophetonan lòs ta bula bai tur kaminda.

Kuminda, awa, bela i bateria 
Banda di e medidanan akí di prekoushon a konsehá pueblo tambe pa kumpra sufisiente kuminda, ko'i bebe, bateria i bela pone na kas. A urgi habitantenan pa sende radio, pa asina nan keda na altura di tur akontesimentu i informashon nesesario.