Hulanda i Estados Unidos ta arma Kòrsou, Boneiru i Aruba fuertemente komo preparashon pa ataká Venesuela. Asina presidente Hugo Chávez a deklará djaweps 17 di desèmber durante e kumbre di klima na Kopenhagen.

Presidente benesolano Hugo Chávez

foto: Reuters

"Tur kos ta polítika", asina un hòmber di edat avansá ta bisa. "Chávez ta bisa diferente kos, pero segun nos ta djis papia e ta papia numa." Un dama bistí na paña di ofisina ta mira esei otro. "Ta un insinuashon serio den direkshon di Kòrsou. Mester wak bon loke e ta bisa."

Base FOL
Otro paseantenan no ta masha sigur ku enberdat lo no bin akshonnan militar kontra Venesuela. Pasobra Kòrsou tin e base militar merikano Forward Operating Location (FOL) ku ta traha pa kombatí kontrabanda di droga den e region, asina e dama ta bisa. Un grupo di hóben tampoko no ta sigur ku e presidente venesolano no tin rason. "No ta asina asina e ta bisa algu", segun un mucha hòmber.

De Telegraaf di djasabra 19 di desèmber a skibi ku un Boeing misterioso RC-135 ta hasi buelonan di spionahe for di aeropuerto Hato na Kòrsou ya ta dos siman kaba. Ku tur probabilidat e avion ta vigilá teritorio venesolano, segun e korant. Ounke ta mashá improbabel, uso dje avion ku kuater motor akí ta fungi komo un promé paso di un operashon militar mas grandi. Asina De Telegraaf a skibi.

Entretantu minister hulandes Verhagen di Asuntunan di Eksterior a manda yama embahador venesolano pa un reunion, pa e duna un aklarashon di e ekspreshonnan di Chávez.