Siman ku ta tras di lomba tabata unu turbulento atrobe pa polítika na Hulanda. Minister di tráfiko i komunikashon Camiel Eurlings di CDA a anunsiá ku e no ta kandidato mas pa su partido pa elekshon di parlamentu dia 9 di yüni. Agnes Kant, kabesante di lista di SP tambe a laga kai. Un dia despues lider polítiko di PvdA, Wouter Bos, ta anunsiá su retiru for di polítika.

El a partisipá esaki djabièrne último bisando ku e ke bai dediká mas tempu na su famia. Djis despues, Job Cohen a anunsiá su retiru inmediato komo alkalde di Amsterdam pa e bira susesor di Wouter Bos. Diferente polítiko antiano a duna nan opinion riba e desaroyonan aki den seno di nan partido (PvdA).
 

Ed Gumbs: "Bai vota awor pa Job Cohen"
Ed Gumbs, miembro di PvdA na Flevoland i presidente di PPAAA, e plataforma di polítikonan di desendensha antiano i arubano, ta urgi Antiano i Arubanonan pa bai vota awor sí masalmente dia 9 di yüni próksimo ku Job Cohen na kabes di PvdA.

Ana Alcantara:"Mi no ta kere k'un superman (Cohen) lo pone mas Antiano i Rubiano bai vota"
Ana Alcantara, miembro di PvdA na Amsterdam Zuid Oost sí ta mashá pesimista ku partisipashon di Antiano i Arubano na elekshon pa parlamentu hulandes na yüni awor. Alcantara si no ta kere ku un 'superman' manera Cohen lo pone mas Antiano i Arubano bai vota, paso simplemente nan no ta interesá den polítika. 

John Leerdam:"Mi ta lamentá ku Wouter Bos ta stòp"
Den seno di polítikonan antiano i arubano, miembronan di PvdA, tin hende ku no ta ègt lamentá ku Wouter Bos a baha komo lider polítiko. Pero tin ku sí ta lamentá esaki. John Leerdam, miembro di parlamento ulandes ta un di nan.

Ruben Severina:"Mi ta sorpresá pero ta un bon desishon"
Pa Ruben Severina, miembro di PvdA na Zoetermeer, e retiru di Bos a bin un poko di sorpresa pero leu ayá e ta kere ku ta un bon desishon, ku Bos a baha komo lider di PvdA.

Ed Gumbs:"No ta sorpresa ku Wouter Bos a baha"
Ed Gumbs di PvdA na Flevoland si no tabata sopresá ku Wouter Bos a baha komo lider di Partij van de Arbeid. For di tres aña pasá el a presentí ku si bin elekshon nobo, Bos lo no ta kandidato mas.

Alkalde pretu?
Awor ku Job Cohen a baha komo alkalde di Amsterdam pa bira kandidato pa liderazgo di PvdA, spekulashonnan ta skeiru tokante ken ta bai bira e próksimo alkalde di Amsterdam. John Leerdam ta opiná.

 
Un kompilashon di Johan Oldenboom.