Sekretario di estado Ank Bijleveld ke pa investigá funshonamentu di gobernashon na Aruba. Promé minister arubano Nelson Oduber ta haña ku e deseo di investigashon akí ta basá riba istorianan deskabeyá. No ta sint'é bon ku Bijleveld ke indagá den asuntunan di Aruba. "Hulanda ta deskonfiá nos i esaki tin konsekuenshanan negativo pa e relashon", segun Oduber.

"Hulanda ke investigá fundamentonan di nos estado di derecho", asina Oduber a sigui bisa rabiá. E ta konsiderá e investigashon anunsiá komo algo 'drástiko ku ta krea presedente': "Esaki ta un mal komienso i e parse un manera di pensa kolonial: 'Mi ta pensa pabo i mi ta bai investigá ábo'. E ta hala atenshon riba e koperashon intensivo di Aruba ku entre otro Hulanda, Merka i Antia ulandes den e lucha kontra kriminalidat internashonal i labamentu di plaka. "Si tin un pais ku'n bon nòmber den e region akí, ta Aruba mes."
 
Kunsumí
E deskonfiansa ulandes ta trese tenshon den e relashon ku Hulanda: "E kos akí tin konsekuensha pa e relashon den seno di rèino i ta pone hende kunsumí den un periodo ku nos mester traha riba bienestar di pueblo." E promé minister arubano no ta komprondé ku Bijleveld ke komplasé petishon di parlamentarionan ulandes: "Mi ta respetá nan opinion, pero e ta puramente basá riba istorianan eksagerá."
 
Es mas, e investigashon ta yega na mal ora pa Oduber ya ku na sèptèmber ta tene elekshon na Aruba. Por konsider'é komo señal di deskonfiansa di e aktual gobièrnu-MEP, ku ta rèina na Hulanda. E ta teme ademas ku oposishon lo 'probechá di e indagashon pa demostrá ku demokrasia na e isla no ta funshoná bon'.
 
Apesar di e resistensha di e promé minister, e no tin miedu pa e investigashon: "Mi no tin idea kiko por ta alarmante na Aruba. I si nos a faya mes, Hulanda tambe a faya, pasobra 90 porshento di e hendenan ku ta traha na Tribunal i na Ministerio Públiko ta di Hulanda." Kiko presisamente lo bai investigá no ta kompletamente kla ainda pa e prome minister.