Dordrecht mester entamá un investigashon relashoná ku e manera ku polis a aktua, djasabra 12 di novèmber durante entrada grandioso di Sanikolas. Asina Overlegorgaan Caribische Nederlanders (OCaN) i Surinaams Inspraak Orgaan (SIO) ta bisa den un komunikado di prensa ku nan a emití.

Durante entrada grandioso di Sanikolas, polis a aktua ku man duru kontra artista Quinsy Gario, ku a protestá kontra fenómeno di Zwarte Piet. Gario i algun otro hende tabatin un t-shirt bistí ku e teksto ‘Zwarte Piet is racisme’. Polis a kita Gario na mal òrdu for di e sitio. OCaN i SIO ke sa si e manera ku polis a aktua kontra Gario ta pèrmitií si òf nò.

Desproporshonal
Pa OCaN aktuashon di polis ta desproporshonal. Glenn Helberg ta trese dilanti ku ta parse manera polis ta hasi un distinshon òf ta diskriminá, tumando medida kontra un persona ku tin su opinion. "Ta parse ku bo no tin mag di bisa ku tin rasismo na Hulanda: i nos sa ku esei ta e kaso di bèrdè", asina Helberg ta bisa. E presidente di OCaN ta kritiká e manera delikado ku Hulanda ta reakshoná, ora ta trata di un di e kosnan sagrado di kultura hulandes: fiesta di Sanikolas.
 
Segun Helberg, na Hulanda ta masha normal pa trapa otro su kosnan sagrado i hasi bofón di nan. Pero ora ta kos sagrado di hulandesnan, e or'ei sí no ta bon. Loke e presidente di OCaN ke ta, pa bin un investigashon. Si resultá ku polis a aktua desproporshonal, e tin di pidi despensa serka Quinsy Gario. Entre tantu munisipio di Dordrecht a duna di konosé ku no ta bai bin un investigashon riba e manera ku polis a atendé ku Gario.

Piet multikolor
Helberg ta haña tambe ku mester por selebrá fiesta di Sanikolas ku un tiki mas kreatividat. Kisas por disidí ku Piet por representá koló di vários rasa na mundu. “Nos tin riba e mundu aki sinku koló. Hende koló kla, hende koló brùuin, hende koló pretu, hende koló hel i kòrá. Hasi e Pietnan tur e kolónan ei, i or’ei nos ta siña nos yunan ku tur hende ta yuda otro i asina forma un base duradero pa e lugá aki.”

Helberg ta hasi un apelashon na artistanan ku ta skibi kantika, kanta i pinta, pa nan tur hasi algu pa duna e kultura aki ‘un push den e bon direkshon’.