For di promé di febrüari Air France-KLM a kuminsá kobra "obesitax", konosí tambe komo "vettax", un sobrekarga pa hende ku peso dimas. Ta bin aserka ku si un persona ta mas hanchu ku 43 sèntimeter, e tin ku paga pa un stul èkstra. Patricia Blijden di agensia di biahe "Krukzieners" na Amsterdam, no ta di akuerdo ku e impuesto pa hende gordo aki. E ta haña esaki algu diskriminatorio.

E medida di Air France-KLM pa laga hende gordo paga un teket èkstra a risibí hopi apoyo pero tambe reakshonnan di repudio.
 

Sondeo
Algu mas ku treskuart di e pasaheronan ku a sondia  ta apoyá e asina yamá 'obesitaks'. Un investigashon di Wereldomroep den kua a pidi opinion di 617 persona ta demostrá esaki. Ta binti porshento so ta haña ku pasaheronan balente nó mester paga pa un asiento adishonal.

Organisashonnan ku ta lucha na interes di hende ku obesitas a reakshoná rabiá riba e plan. Nan ta di opinion ku e kompanianan di aviashon mes mester pèrkurá pa stul adaptá den avion.
 

Merka i su maneho
Kompanianan di aviashon na Merka, manera Southwest Airlines i United Airlines ta hibando un maneho kaba kaminda hende ku sobrepeso mester kumpra teket pa un di dos stul. E pasaheronan por risibí nan plaka bèk ora resultá ku avion no ta yen. 
 

Diskriminashon
Patricia Blijden di agensia di biahe "Krukzieners" na Amsterdam no ta di akuerdo ku 'obesitaks', ya ku segun e ta diskriminashon di e kliente.

Blijden ta konta ku ora e notisia a drenta e kos a kue nan for di base na e agensia di biahe. Promé e asuntu di Obesitaks lo a drenta na vigor entrante promé di aprel 2010, pero de pronto a resultá ku ta for di promé di febrüari.
 

Pro i kontra
Di un banda ta hustifiká ku un hende ke sinta kómodamente den su stul, na lugá di kompartié ku hende ku ta muchu hanchu, i ku ta tuma tur lugá, moda ku ta bira muchu pèrtá.
Di otro banda, e preis ta haltu kaba pa biaha, kòrda si mester paga un teket mas. Tin hende ku a paga teket dia bieu, antó pa awor KLM anunsiá e asuntu di obesitaks 15 di yanüari, pa e bira vigente promé di febrüari.

Blijden no ta kere ku mester laga pasahero paga èkstra, i sigur no si nan a kumpra nan teket for di aña pasá.