Inflashon, salubridat públiko i belasten ta asuntunan ku entretantu a yega na orea di minister Liesbeth Spies di Relashonnan di Reino, despues di a bishitá Boneiru i Saba. N'e di tres isla di BES, esta Sint Eustatius, tambe nan ta tópiko di kòmbersashon, ma loke a dominá diskushon ayá durante bishita di Spies tabata e plannan di ekspanshon di empresa petrolero NuStar. E ekspanshon ta ofresé oportunidat i posibilidat, ma e ta menasante tambe.

NuStar ke konstruí 31 tanki di depósito adishonal rib'e terenu mió konosí komo The Farm. Un parti konsiderabel di habitantenan di Statia ta protestando lunanan largu kaba kontr'e plannan di NuStar. Un di nan ta Joshua Spanner. "Mi no ta maint ekspanshon, sino e lokalidat." E ta referí na proksimidat di skol i di airopuerto. E ta pegá ku plantashi i habitat di gran importansha istóriko. "Sentro di Oranjestad ta na un distansha di 700 meter so."

Huma tóksiko
Spanner ta sumamente prekupá ku falta di un plan pa evakuá hende. "Nan di ku chèns di un desaster ta 1 rib'un mion." Ma si algu pasa ta difísil kalkulá konsekuensha djesei. Statia ta disponé di dos trùk di brantspùit so, NuStar mes tambe tin dos. "Haf ta bira inaksesibel si tin kandela, pa motibu dje kayente. Anto huma pretu venenoso lo tapa airopuerto."

Spanner sa e solushon. Mester instalá e tankinan n'e otr'un banda, pa e seru fungi komo un muraya natural anti-kandela pa sekshon habitá di Sint Eustatius. "Òf nan por ekspandé den laman dilanti e terminal eksistente. Pero NuStar ta bisa ku esei ta kosta 150 mion di dòler èkstra. Pa mi esei ta un sakrifisio chikí pa seguridat di nos komunidat."