“Bo no ta hasi èksamen pa forma famia. Hopi mucha tin falta di amor. Mayornan no sa kon trata ku nan yunan”, minister Hensley Koeiman di Desaroyo Sosial, Labor i Bienestar ta bisa. “Famianan na Kòrsou ta bou di preshon haltu i mester di ayudo.”

Gobièrnu di Kòrsou ke duna mas atenshon na famia pa forma un komunidat kurasoleño sano pasobra famia ta e pilá di sosten di mas importante di un komunidat ekilibrá, asina Koeiman a enfatisá na final di Siman di Famia djadumingu pasá.

Momentonan íntimo
Famia Schoop ta sintá den un sírkulo bou di un palu di mangel na bulevar di Mari Pampun, mientras ku un bientu di kosta ta bula bin den nan direkshon. E famia ta bini originalmente di Mari Pampun i regularmente ruman hòmber, ruman muhé i nan famia ta bini seka otro. Dokter Yves Schop ku amor den su bos ta papia di su famia. E ta splika pakiko famia ta importante. “Famia ta e kuminsamentu i e fin Dos momento importante den bida di un hende ta nasementu i morto. Bo mester di famia e oranan ei. Ta e momentonan di mas íntimo den bida.”

Dokter Schoop ta papia di norma i balor, protekshon, edukashon, amor i kompaño. “Den mi ofisina di dòkter di kas ta bini hende ku keho físiko, ku bon mirá ta ekspreshon di problema sosial sikológiko. I mester bini ayudo p’esaki. Gobièrnu tin bista p’esaki.”

Komunikashon
A petishon di organisashon di bienestar i hende muhé Seda, gobièrnu a amplia Dia Internashonal di Famia pa Siman di Famia. Seda no ta guia solamente hende muhé sino tambe hóben i pareha. Presidente Meyrtha Leetz-Cijntje ta bisa ku hobennan den e Siman di Famia aki a indiká di kiko nan ta sinti falta na kas: adulto no ta skucha nan basta i nan no ta komuniká. Leetz-Cijntje: Tata i mama ta drùk ku trabou pa trese plaka kas. E muchanan ta pidi un unidat bèrdadero, momentonan pa ta huntu i kompartí i komuniká efektivamente.”