No tabatin lugá pa a pone auto y na cierto momentonan trafico a pega. Y no ta papia aki di caminda grandi, sino tur e camindanan cu ta core rond di e edificio di  Servicio di Impuesto, SIAD, segun Bon Dia Aruba. Ayera tabata e ultimo dia pa paga e prome kwartaal di impuesto di vehiculo y tabata parse cu tur esnan cu a warda ta ultimo momento a bin hunto tambe. 

Te cu 12 di Februari , no menos cu 17.684 doño di auto no a paga nan number di auto ainda. Esey ta representa 33 porshento di e total di 54.647 auto priva cu tin registra na Aruba. Esnan cu no a paga ayera, ta core risico di perde nan number, pa no papia mes di boet.

Ultimo Momento
Esaki ta motibo tambe pakico asina hopi hende a acudi na SIAD ultimo momento, cu tur su consequencianan. No solamente den e tempo cu mester a tuma pa paga ayera, pero hasta pa haya un luga pa staciona auto. Hasta mester a haci uzo di e tereno di ex Caribe Club, pa asina acomoda mas hende y auto posibel.

Y e rij di hende obviamente tabata hopi largo.  Tanto pa haci e pagonan, como despues pa busca e plaachi di number. Algun hende mester a warda te hasta 1 ora y mey pa nan por a haya nan plaachi, despues di a warda  pa haya turno pa paga.  Mayornan cu baby tabata haci uzo di e trapinan pa sinta, pa motibo cu no tabatin otro luga pa warda.

Druk
E problema no tabata unicamente cu hopi automobilista a laga te na ultimo pa paga nan number, tambe esnan cu mester a paga e impuesto di vehiculo pa henter aña, manera motociclistanan tambe tabata presente. Riba dje, ayera tabata e dia cu negoshinan mester a entrega loonbelasting, BBO, haci nan pagonan annual pa permisonan y otro.

“Ayera tabata e dia mas druk pa SIAD den henter aña,” vocero di SIAD Meverly Romano a bisa. “Ayera tabata e ultimo dia pa haci diferente pago, y e tabata obvio cu hende a warda tambe te na ultimo. Romero a agrega  “apesar cu tabata prepara pa hopi hende, no por spera cu por atende miles di hende riba un solo dia sin cu tin tardanza.”

Mayoria automobilista a paga na ora. Es mas SIAD tabata habri riba Diasabra mainta durante luna di Januari pa a facilita clientenan den nan pago. Y aunke cu hopi hende a haci uzo di e posibilidad, “nos no a ripara cu e dianan ey tabata hopi druk. Asina mes, mas cu 17 mil hende a laga te na ultimo pa bin paga.”
Riba dje, por a haci uzo di paga via banco.

Banco
Sinembargo, tin clientenan no a tene cuenta cu no solamente mester paga pa e impuesto pa vehiculo, sino cu tambe tin e gasto di 20 florin pa e plaachi mes. Banco no ta obliga pa tene cuenta cu esaki tampoco, mirando cu ta un servicio ta dunando y no tin e obligacion pa avisa clientenan. Consequentemente, hopi hende cu a pasa pa busca nan plaachi a haya e noticia amargo cu nan no por a ricibi’e pa motibo di no a paga e 20 florin. Pues, nan tambe mester a para den rij pa paga y despues pa bolbe busca e number.

SIAD a percura pa mas trahado den e dianan aki, y apesar di otro trabounan, mayoria di e trahadonan na balie a atende personanan cu mester a paga nan number di auto. Mescos ta e caso cu entrego di e plaachinan. A percura cu tin mas hende disponibel pa asina percura cu e fluho cana miho.

Warda
“Pero di mes, na momento cu asina hopi hende a warda te ultimo dia pa paga, no por spera cu SIAD por procesa tur hende mesora.” Normalmente un cliente ta warda 15 minuut na SIAD pa e por keda atendi. Den e dianan tras di lomba, un ora pa warda tabata relativamente cortico.

E vocero ta kere cu den e siguiente dianan, SIAD lo keda druk, aunke e lo no ta mes pisa cu ayera. Personanan cu ta paga via banco ademas mester ta consiente cu nan por pasa busca nan plaachi di number despues di tres dia di trabou, ya cu esey ta duna e trahadonan tempo pa controla tur cos y pone  e plaachinan cla pa busca nan.