Na Amsterdam ta tene enkuentro na vários iglesia di migrante den Bijlmer pa kura hende ku a kontagiá ku viro di HIV. Ta trata di e asina yamá 'HIV-healings'. Lástimamente tin pashènt seropositivo ku ta stòp di tuma remedi i ta bira mas malu. Juan Walter, funshonario di GGD na Amsterdam ta konsehá pa no stòp ku remedi pasobra no tin niun prueba sientífiko ku ta bisa ku por kura ku healing.

Minister Klink di Salubridat Públiko a anunsiá resientemente ku ta bai hasi un investigashon di e healing-nan ku ta tuma lugá prinsipalmente den e komunidatnan antiano, sürnam i afrikano na Amsterdam. Asta ta eksistí e posibilidat ku aki poko ten ta introdusí e asina yamá 'HIV-healings' na Antia tambe. Juan Walter ta informá ku tin kuater kaso di pashènt ku HIV ku a stòp di usa remedi. Un di e kasonan ta un hòmber homoseksual ku a bai resultá den hòspital. E hòmber aki tabata seropositivo pa basta tempu i e no tabata dje malu ei, pero entre tantu el a empeorá pa motibu ku el a laga su remedinan para. Segun Walter tin sigur dies kaso di Antiano ku ta partisipá na e healing-nan di HIV.

Aktualmente GGD na Amsterdam ta tene enkuentro ku lidernan di iglesia pa informá nan i haña koperashon riba tereno di malesa di aids i di kontagio ku víro HIV. Juan Walter, trahadó di GGD na Amsterdam enkargá ku promoshon di salubridat ta informá, ku loke ta mas importante pa un hende ku tin aids ta pa sigui usa su remedinan. Segun Walter e interes pa partisipá na e enkuentronan aki ta grandi, pero ku no ta solamente pa kura di aids e hendenan ta asistí. "Tin hende ta bai tambe pa kura nan di nan naturalesa seksual", Walter a bisa, indikando tambe ku e kantidat di interesado na un healing ta dependé di tamaño di e lokalidat.

Energia di Dios
Loke ta tuma lugá na e healing-nan ta entre otro resamentu i pidimentu pa e asina yamá 'diabel' sali for di e persona. Despues di e resamentu ta bisa e pashènt ku e mester tin fe ku e ta kura i ku e por stòp di usa su remedinan. E energia positivo lo perkurá, segun e resadónan ku e persona ta kura. Walter: "Mi ta kere ku ta bon pa hende saka forsa for di orashon, pero si bo ta malu bo mester keda usa bo remedinan".

Mas aleu Walter a bisa ku el a konstatá, ku hopi hende ta sinti nan mas mihó komo ku nan sa ku e energia di Dios t'ei. Pero nunka nan no a laga nan medikamentu para. Pero tin kaso di healing kaminda hende, ku tabata relativamente bon di salú ta légumai nan remedi despues di a partisipá na e seshonnan di orashon, ku e konsekuensia ku nan a kuminsá haña síntoma di Aids. Esaki lo no a tuma lugá si nan a sigui usa nan remedi, Walter a enfatisá.

E konseho di Juan Walter na Antianonan, ku ta partisipá na e healingnan di HIV ta, pa asistí pa haña forsa, loke no ta nada malu, pero no stòp di tuma e remedinan pa ningun hende. Pasobra te ainda no tin ningun prueba sientífiko ku ta bisa ku bo por kura ku healing.

Healing na Antia
GGD Amsterdam ta wak kon por traha riba tereno di prevenshon konhuntamente ku lidernan religioso. E sosten di e lidernan ta pa yuda pasa e mensahe ku pa tene salú seksual bon, tin sierto asuntunan ku mester tene kuenta kuné. Riba e pregunta ku si e tin informashon ku e healing-nan ta tuma lugá na Antia tambe Juan Walter a bisa, ku el a komprondé ku e hendenan ku tabata organisá e healing-nan na Amsterdam ta preparando pa bai Sürnam i no ta ekskluí e posibilidat ku nan ta bin Antia tambe.

'Mi sa ku tin sierto religion, entre otro New Song, ku ta bisa ku nan por kura hende, i pa bai bèk riba e bon kaminda. Pero e palabra kura, segun Walter, ta muchu 'amplio'. Walter ta konvensí ku e iglesianan por yuda e hendenan kue bon kaminda, pasobra e úniko kura por ta resultado di uso di medikamentu i di terapia.