Kantante outor kurasoleño, Nicole Bus a kuminsá kanta i skibi kantika ku su 11 aña. I el a kosechá fruta. El a gana konkurso 'Grote Prijs van Nederland' na 2010 komo mihó kantante. Na fin di 2011 el a sali 'Serious Talent' di emisora di radio 3FM. Nicole ta kanta kansionnan ku tin un mensahe i ta dirihí na públiko henter.

Por engeneral Nicole Bus (22) ta kanta kansionnan kristian pero e no ke pa tipifik'é komo un kantante gòspel. "Kantantenan di gòspel ta keda pegá den e mundu kristian. Pero ami no ta trahá p'esei. " E ta definí su mes komo un 'kantante ku tin un vishon propio di músika'. E ke pone tur su kreatividat den su müzik. Aña pasá el a lansa su promé disko: 'The Heart of the Matter'.

Sena ku pareha real
Komponé músika i skibi letranan pa piesanan bunita, esei ta loke ta deseo di Nicole for di tempu ku e tabata na skol sekundario. Entretantu portanan ta mustra di ta habriendo p'é. Esta for di 2010 tempu ku el a gana e premio 'Grote Prijs van Nederland'. "Bo ta drenta den un aventura i ta bishitá diferente medionan di komunikashon. Mi a haña un invitashon di un sena serka prínisipe Willem Alexander i prinsesa Máxima." Nicole Bus ta orguyoso ke ta'tin mag di sinta na mesa ku e pareha real. Lamentablemente en no por a kanta pa nan: "Tabatin asina tantu otro artista na mesa. Un anochi no ta sufisiente pa nos tur laga mira kiko nos por".

Kòrsou
Bida artístiko no ta fasil, Bus ta konta: "Bo mester traha duru. Gobièrnu ta ekonomisando i no ta stimulá pa artistanan pa kuminsá ku un karera profeshonal". Pero e no ta laga esei deskurash'é'. E ta spera di por bishitá Kòrsou e aña aki pa por presentá riba algun tarima. Nicole su mayornan a nasé na e isla. "Tin algun plan sí. Ta mi gran deseo pa partisipá na festival Curacao North Sea Jazz".