Skibí pa Ronald A. Muyden

 
Nick Sparen (29) ta un yu’i Kòrsou ku ta biba na Apeldoorn. Despues di dies aña Sparen ta kla pa bolbe Antia.
 
Nick Sparen ke konstruí su kas pa kaba riba e tereno k’el a haña di su tata na Boneiru. Awor mas ku nunka e ke kuminsá traha su kas, pasó desèmber ku a pasa ladronnan a hòrta su materialnan di konstrukshon, kos ku a sosodé un biá kaba.
 
 
Remarkabel
Nick Sparen ke konstruí su kas ku ayudo di boluntario. Su rekompensa pa yud’é ta enserá: kuminda i kos di bebe pòrnada i aabes momentunan ameno ku otro. Sparen ta di idea ku su proyekto ta algu otro. Di e manera aki Sparen ke trese hende huntu i pasa felis i kontentu ku otro. 
 
Sinti falta
Ora Sparen bai bèk Antia lo e sinti falta di e outopistanan na Hulanda. Tambe e lo sinti falta di e paisnan bisiña. Komo yu di Kòrsou bibando na Hulanda, bo ta drèi bishitá nan ku outo por ehèmpel. Maske ku e lo sinti falta di e kosnan aki, Sparen ta konvensí ku lo e por sobrebibí na Antia sin nan. “Mi lo bai yena e falta aki ku por ehèmpel plantashon di mata i konstrukshon di mi kas”, segun Nick Sparen.  
 
Kla pa bai
E motibu ku Sparen no a bai bèk Antia ainda ta ku e kier a warda promé nan bende e kas di su mama. Sparen ta konta ku e kas ta dos aña kaba na benta sin por bende. E ta sigui splika ku e ta kere ku ta pasó e kas tin un ‘kachel’ i no un ‘centrale verwarming’. “Alabes nos ta den un temporada di krísis ekonómiko”, asina Nick Sparen ta splika. 
 
For di algun luna pasá e yu’i Kòrsou a paketá su maleta ku entre otro paña i sapatu. “Mira akí, mi maleta ta kla pa mi bai … ”.