Boneiru, Saba i Sint Eustatius ta karesé di kuido médiko spesialisá, ta p'esei un kardiólogo antiano rubiano por nifiká hopi pa e islanan chikitu ei, asina spesialista di kurason Juan Carlos van Leeuwen ta opiná. Kardiólogo van Leeuwen tin algun tempu ta tene konsulta na Saba, pronto lo e bishitá Boneiru i Sint Eustatius tambe komo spesialista. Van Leeuwen ta splika ku si konsiderá distansha entre e islanan i mama patria, ta mas práktiko pa buska kuido médiko spesialisá den region di Karibe ku na Hulanda.

E kardiólogo a ripará na e islanan chikitu ku hopi biaha pashèntnan no ta bai un otro isla pa tratamentu. Esei por ta pasó 'nan no tin gana di biaha'. E gastunan envolví tambe ta por spanta hende. Di otro un banda ta asina, ku na e islanan chikí dòkternan di kas mes tambe tabata hasi trabou spesialisá.

Tin relativamente hopi pashènt ku preshon haltu i ku ta sufri di suku na e islanan chikitu. Van Leeuwen ta haña importante pa duna atenshon na prevenshon di problema ku e afekshonnan akí nan por krea. Mester wak bon ta ki remedi ta uza 'pa evitá problema kardiovaskular.'

Ekipo i fasilidat
Aktualmente e islanan chikitu tin fasilidat pa hasi sierto tèst spesialisá manera tèst di ritmo di kurason. Hulanda a finansiá e fasilidatnan. Personal médiko lokal ta haña entrenamentu pa nan por hasi e tèstnan. Na Boneiru por implantá markapaso (pacemaker) den e sala di operashon ku tin. Esei no por na Saba ni na Sint Eustatius.

No por someté hende na operashonnan sofistiká manera 'dòter' na niun di e seis islanan hulandes karibense. Sint Maarten tin un kardiólogo na e parti franses. Pa kasonan kompliká e parti franses di e isla ta akudí na Guadeloupe i Martinique. Segun Van Leeuwen 'esei ta bon reglá na Sint Maarten.'

Kardiólogo Juan Carlos van Leeuwen - Belkis Osepa a entrevist'é