Na Sint-Maarten e partido National Alliance (NA) a keda e partido di mas grandi despues dje elekshon di Konseho Insular na e isla. E partido guiá pa William Marlin a haña shete asiento. E partido ku a lanta djis poko tempu pasá United People (UP) di Theo Heyliger den un tiru a haña seis asiento. E sobrá dos asientonan a bai pa Democratic Party (DP) di Sarah Wescott-Williams.

Dia 10 di òktober e Konseho Insular nobo lo bira e promé Staten di e pais nobo Sint-Maarten i pesei a amplia e asientonan di diesun pa diessinku. Pa promé biá den historia dje isla lo mester forma un koalishon pa goberná Sint-Maarten pasobra niun dje partidonan no a logra un mayoria apsoluto.

Partisipashon
E elekshon pa yega na un Konseho Insular nobo a haña bastante interes dje poblashon, segun koresponsal Paul de Windt na Sint-Maarten. "Mas tantu hende ku nunka a biba ku e elekshon akí. Tabatin hopi hende riba kaya i un asistensia di 71.1 porshentu na e urnanan." E porsentahe akí ta relativamente haltu. Normal bandi di sesenta porshentu di esanan ku derecho di vota ta hasi esaki. Un total di 19.601 hende por a bai vota i algu mas ku 14 mil a hasi esaki. De Windt: "Pa promé biá despues di hopi tempu tabatin tres partido ku bo por konsiderá grandi den kontienda elektoral. Esei a pone ku e propagandanan tabata hopi mas ku mas tantu hende ku nunka a bai vota."

Koalishon
Partido gobernante NA a haña shete asiento i UP di Theo Heyliger, nietu di ko-fundadó Claude Wathey di DP, a haña ku su partido nobo seis asiento. Koresponsal Paul de Windt no ta papia di ganadó dje elekshon. "Den nos sistema bo a gana ora bo tin mayoria. A ekspandé e Konseho Insular di 11 pa 15 asiento ya e por bira e promé parlamentu di pais Sint-Maarten. Dor ku ningun partido no tin mayoria nan mester forma un koalishon, loke ta algu no usual na Sint-Maarten."

Promé minister-presidente
Lider di NA William Marlin ya tabata spera pa bira e promé minister presidente di pais Sint-Maarten. Pero esaki no ta determiná ainda debí na e resultado di elekshon. De Windt ta kere diferente formashon ta posibel. "Mayoria biá ta dos partido grandi tin. Awor ku un koalishon ta nesesario ta posibel ku e partido di mas grandi NA ta keda afó i UP i DP forma e Konseho Insular nobo ku 8 dje 15 asientonan.

Otro posiblidat ta ku NA i UP bai traha huntu ku un mayoria grandi di 13 dje 15 asientonan." Pero alabes De Windt ta analisá bisando ku e delaster kombinashon por ta difísil relashoná ku e kampaña dje delaster simannan. "Heyliger (UP) a sali di DP i keda komo diputado independiente den Konseho Insular huntu ku NA. Pero despues ku sondeonan a mustra ku e por bira e partido di mas grandi i tabatin un menasa ku lo e por surpasá NA, e atakenan dje partnernan di koalishon a bira fuerte. Pues NA por bai traha ku DP.'"