Den kuadro di e proyekto 'Jong 2009' a proklamá Nadya van Putten di Aruba komo unu di e dies hóbennan ehemplar (rolemodel) na Rotterdam. Ta konsider'é komo e polítiko mas prometedor di e siudat na oria di Maas, un di e riunan grandi ku ta atravesá Hulanda.

A presentá Nadya van Putten di 27 aña di edat komo e persona sentral den un talkshow ku a tene ayera djadumingu 18 di òktober. Un gran onor. "Tabata straño, realmente e kos a toka ami. Normalmente mi sa papia di ideanan di índole polítiko." Den un eksposishon di e dies personanan ehemplar, por mira Van Putten den presente, pasado i futuro. "Mi kier a bira polítiko i awor mi tá un polítiko. Komo rolemodel mi ke pa otro hóben tambe realisá nan soño."

Ademas,e damita rubiano tin un soño ku ainda mester bira realidat. "Mi ke drenta Tweede Kamer i konvertí Hulanda den un mió pais." I Aruba awó? "Komo parlamentario ulandes bo no tin mashá di aber ku Aruba, loke mi ke mas bien ta pa hende konsiderámi komo elemento renovador di polítika. Ami ta un di e poko polítikonan íntegro ku no ta mira e nesesidat di nepotismo i korupshon."

Skucha un entrevista di Leila Wijnhoven ku Nadya van Putten (na papiamentu)