Miéntras ku na Hulanda, Gay Krant su hotline pa homoseksual ta rin sin stòp, na e organisashon di homoseksual na Kòrsou Pink House, no tin keho ta drenta mes. Segun e presidente, Dudley Ferdinandus, tèrmentu di homoseksual den nan bario ta un kos ku práktikamente no ta sosodé riba e isla.

“Den e aña i mei ku nos tin di eksistensia, nos no a yega di risibí niun keho di pareha homoseksual ku ta haña nan obligá di muda debí na pèstermentu. E situashon na Hulanda ta preokupante. Ménos mal ku, te asina leu ku nos sa, akí no tin e problema ei”, segun Ferdinandus.

Segun e presidente, podisé sa sosodé ku hende ta molestiá homoseksual anto nan no ta mèldu esei na Pink House. “Pero hende ku tin ku muda, esei sí nunka nos no a yega di topa. Na Kòrsou, riba niun tereno kos no ta dje malu ei, ètòl.”

Keho na gran kantidat
Djamars pasá, Gay Krant na Hulanda a habri un number di telefòn i un mailbox spesial. Motibu pa e hotline spesial akí ta un reportahe ku a sali den de Telegraaf di djaluna 26 di sèptèmber, tokante un pareha homo di Den Haag ku tabatin ku muda debí na pèstermentu. Yüni aña pasá tambe un pareha homo di Utrecht a sali den notisia pasobra  despues di un aña i mei di pèstermentu nan a disidí di muda bai. For di dia ku a habri e hotline, mas di sinkuenta keho a drenta kaba.

Komportashon ménos riparabel
Ferdinandus ta pensa ku mas o ménos dies porshento di poblashon di Kòrsou ta homoseksual. Na su opinion, komunidat ta aseptá e 15.000 hendenan akí debí ku nan komportashon ta ménos riparabel ku di sierto homoseksualnan na Hulanda. “Homonan riba e isla akí ta mas diskreto. Ademas, sa sosodé mas biaha aki ku dos hende muhé ta biba huntu den kas ku mucha, sin ku esei ke men ku nan ta lèsbi.”

Kòrsou komo destinashon ideal pa homoseksual
E karakter tolerante di poblashon di Kòrsou tambe ta hunga un ròl segun Ferdinandus. “Edifisio di nos organisashon ta na skina di Frederikstraat i Charlottestraat den Otrobanda, no eksaktamente e bario di mas sigur riba e isla, pero nunka nos no tabatin problema. Mas bien, e habitantenan ta asta aserká nos pa informashon. Nan ta hopi habrí.”

Gaytravel.com, un wèpsait ku ta konsentrá riba homoseksual, ta konfirmá esei. Kòrsou ta aparesé na promé lugá den nan top sinku di mihó destinashonnan. E wèpsait ta gaba e isla pa su ‘poblashon tolerante, presioso playanan i klima fantástiko’.