Referèndem na Kòrsou dia 15 di mèi ta tópiko di diskushon tambe serka Antianonan na Hulanda. Opinionnan di yu di Kòrsou na Hulanda tokante futuro di nan isla ta meskos ku na e isla mes, dividí. Por a ripará esaki klaramente durante e debate dia 8 di mèi, organisá pa redakshon karibense di Radio Nederland Wereldomroep.

Sala di Stichting Welzijnsbevordering Antillianen en Arubanen (SWA) a yena gradualmente na Rotterdam. Partisipashon dje reim setenta hende presente tabata bon notabel. Largu tempu despues ku e debate a finalisá ainda hopi hende a keda kòmbersá i diskutí ku otro riba nan punto di bista: Resultado lo ta 'Sí' òf 'Nò'?

Studiante, yu di Kòrsou interesá i esnan aktivo riba tereno sosial na Hulanda a hasi uso dje oportunidat pa diskutí ku otro riba e referèndem. Ed Gumbs, presidente di e Plataforma di Polítikonan Antiano i Arubano i periodista Marlon Reina a partisipá na promé instante na e debate guiá pa moderador Désirée Martis. Roald Helm, miembro di konseho munisipal na Purmerend, tabata dispuesto pa duna su opinion riba e diferente ponenshanan presentá na e partisipantenan i na públiko.
 

Interes
Partisipantenan na e debate ta kombensí ku Antiano na Hulanda tin interes den e referèndem na Kòrsou, ounke nan no tin mag di vota. Tantu e partisipantenan komo públiko ta informá nan mes pa medio di énternèt, korantnan lokal i ora nan bishitá Kòrsou. Marlon Reina ta haña ku ta un lástima ku suministro di informashon ta dividí den dos kampo. Partikularmente pasobra ta trata di un asuntu masha importante, esta futuro dje isla. "Mi tin un opinion miksto. Miedu i deskonfiansa ta prevalesé. Ta usa e referèndem pa metanan polítiko. I ta mashá lástima ku e diskushon ta tuma lugá den e kuadro ei."

E saneamentu di debe di Antia, ku Hulanda a tuma na su enkargo, ta parse un asuntu prekario na Kòrsou i tambe durante e debate. Públiko presente a pidi palabra den e diskushon dje partisipantenan na e debate. Un grupo di studiante mashá embolbí den desaroyo rònt dje referèndem, ta haña ku ta lógiko ku Hulanda ta pone kondishon pa e saneamentu di debe. Studiante Milagros Navarro tabata anhelá pa hiba palabra: "Gobièrnu di Kòrsou nó por dil ku su finansa. Ta mas ku klaro ku ta bin un supervishon."

Roald Helm enkambio ta haña ku mester buska alternativa pa sanea e debe di gobièrnu di Kòrsou. "Kondishon pa supervishon finansiero ta na interes di gobièrnu hulandes; no na interes di rèino. Bo no por implementá un kondishon asina for di punto di bista di rèino."

Ed Gumbs ta sostené esnan na fabor di 'Sí' na Kòrsou. "Debe ta mashá haltu awor. Di otro manera pais Kòrsou lo kuminsá ku un debe muchu haltu. Hulanda lo no a pone e kondishon ei, si no tabatin debe." Mas aleu Gumbs a trese dilanti ku na Hulanda tambe no ta nada straño pa supervisá maneho finansiero di munisipionan. "Si nan gasta mas ku a presupuestá, nan lo kai bou di kuratela di provinsia."

Kasi tur hende ta di akuerdo ku ta bon ku e referèndem ta tuma lugá. Pueblo di Kòrsou mester haña e oportunidat pa duna su opinion. Esei ta demokrasia, segun Roald Helm. "Tambe ta bon ku tin diferensha di opinion. Den un demokrasia esei ta algu sano."

Ed Gumbs ta haña tambe ku ta bon pa konsultá ku pueblo, pasobra ta negoshá tokante algu ku ta mashá importante pa Kòrsou. Pero e ta atvertí sí ku ta trata di un konsulta popular sin ningun base konstitushonal. "I netamente tokante derecho polítiko e pueblo no ta bin informá", asina Gumbs ta afirmá. "Nan no sa kiko nan tin na e referèndem."

Periodista Marlon Reina tambe ta kuestioná e informashon ku kampo 'Sí' i 'Nò' ta duna pueblo. "Tur dos kampaña ta basá riba miedu riba diferente tereno, loke ta konfundí pueblo."
 

Lo ta Si of Nò?
Roald Helm ta kere ku mayoria na Kòrsou lo vota 'Nò'. Temporada ku hende ta baha kabes i aseptá tur kos a pasa, asina e ta bisa ku seguridat. "Pueblo ta konsiente ku ta kana spanta hende. Mi ta sigur ku denter di sinku pa seis aña nos ta bira independiente."

Ed Gumbs ta pensa enkambio ku Kòrsou ta mas pro Oraño ku kualke otro parti di rèino hulandes. "Durante referèndem na 2005 solamente 5% dje poblashon a vota pa independensha di Kòrsou. Nos ta keda mará na Hulanda."

Ruben Severina, èks presidente di MAAPP (Movementu Antiano Pa Partisipashon red.) tambe a djòin e diskushon: "Un 'Sí òf 'Nò' no ta relevante, si bo no sa kiko bo ke logra. Kiko ta vishon tras di un 'Sí' òf un 'Nò'? Kiko ta nan anhelo? Dor dje 'Nò' nos por logra bienestar dje pueblo? Mi ta duda ku si 'Nò' gana nan lo haña mihó bienestar. I si ta 'Sí': Kiko ta nifiká pa keda den rèino? Votadónan di 'Nò' i 'Sí' mester desaroyá un bon vishon pa mira bienestar di Kòrsou."
 

Keda kòmbersá
Miradanan asombrá den sala di SWA ora moderador Désirée martis a anunsiá ku lástimamente e debate a yega na su fin. Esei no a kita ku e diskushonnan riba e referèndem a kontinuá. Públiko a interkambiá argumentu pakiko mester vota 'Sí'òf 'Nò' durante referèndem di 15 di mèi, turesten ta saboriá un snèk antiano i algu di bebe.