Riba Dia internashonal di Museo a hasi akto di apertura no ofisial di Museo Savonet, un instituto ku ta enfoká riba istoria kolonial i bida riba plantashon na Kòrsou. Promé ku por a kambia kas di shon di Savonet den un museo, a restour'é ku ayudo finansiero di Hulanda.

Direktor sinematográfiko, artista i konservadó invitá Felix de Rooy ta responsabel pa e loke bishitante por mira i eksperenshá den e museo nobo. Segun de Rooy e kas di shon na Savonet ta e promé museo na e isla ku ta ilustrá istoria kolonial via tema i ta mustra tambe kon bida riba plantashon tabata.
 
E museo nobo ta dediká atenshon na tur e diferente kulturanan ku Kòrsou a konosé den transkurso di tempu: indjan, afrikano, oropeo. Naturalesa tambe ta un di e temanan sentral di e museo. E instituto ta situá den parke nashonal di Kristòfel, konosí pa entreotro e pinturanan di Indjan den kueba.
 
2900 promé ku Kristu te 2010
Museo Savonet ta kubri istoria di 2900 promé ku Kristu te bin kontra aña 2010. E parti ariba di e museo tin kultura spiritual komo tema. Ei bishitante por wak pelíkula i artefakto ku tin di aber ku nasementu, matrimonio, religion i morto. Den kada kamber ta pasa un pelíkula ku ta splika e bishitante kiko e ta mira.
 
Mira i eksperenshá 
De Rooy ta splika ku museo Savonet  ta duna e bishitante 'un eksperiensia istóriko' ku e material oudiovisual. E parke nashonal na su turno ta duna e bishitante un 'eksperensha físiko di naturalesa'. Tin plan pa bini ku un museo di naturalesa den e mangasinanan ku tin dilanti kas di shon. 'Pero lo dura algun ten' promé ku esei keda kla.
Aktualmente Landhuis Savonet ta propiedat di e organisashon pa kuido di naturalesa, esta Carmabi. E kordinadó di e proyekto, Leon Pors, ta kòrda ku e restorashon tabata difísil pa finansiá pasobra e meta no tabata kla tanten ku e landhuis no tabata propiedat di Carmabi.
 
Plantashon mas antiguo
E plantashon no solamente ta esun mas antiguo di Kòrsou, pero tambe esun ku a keda produsí mas tempu. Esaki ta pone ku pa Pors ta bal la pena aún mas pa hasié un museo. "Ta un di e plantashonnan kaminda hopi di e strukturanan ta konta e historia." Ademas di e museo di naturalesa Pors ke usa e kasitanan di katibu dilanti di kas di shon i inkorporá nan den e museo.