Museo Arkeológiko Nashonal di Aruba ta kompletamente renová. Djadumingo 26 di yüli a habri e lokalidat nobo ofishalmente na Schelpstraat den presensha di prensès Margriet i su esposo Pieter van Vollenhoven.

 
E tribunanan públiko riba plenchi di e museo arkeológiko nobo tabata yen yen. Paden e dignatarionan ta e proménan ku a hasi un rekorido pa sera konosí ku tur opheto den e museo. Promé minister Emily de Jongh-Elhage, minister Plasterk, algun gobernadó i e Pareha Real a hasi asina tantu pregunta ku e rekorido a dura mas di loke a plania, segun Anina Franka Ruiz,  kolaboradó di e museo.

E museo ku a bolbe habri i tambe Parke Nashonal Arikok a bira proyektonan ehemplar di konservashon di naturalesa i di kultura di Aruba, asina Ruiz ta bisa orguyosamente. "Nan a lucha hopi aña pa atenshon." E ta spera ku e museo, ku ya ta eksistí 28 aña, a bira mas interesante pa tur esnan ku ta bishitá e isla regularmente.
 

Modèrnu
A modernisá e museo i el a bira muchu mas interaktivo. "Tin mas o ménos seishen artefakto, nos por troka un parti tambe. Es mas, no solamente por mira i lesa informashon, sino ku ademas por skucha i mishi kune." Fuera djesei e bishitante por kontestá preguntanan variabel di kwes. Desde reapertura di e museo tin eksposishon tambe di algun opheto arubano di antaño, ku a fia pa tanten di Museum voor Volkenkunde, e museo etnológiko na Leiden.

Un programa kultural yen di kanto, baile i músika durante e apertura dimes no por a keda afó, ya ku Weganan di Rèino ta konsistí di un sekshon kultural tambe, aparte di esun deportivo. De echo a dediká e obra teatral VIS spesialmente na e apertura. E artistanan ta di vários isla i di Hulanda. "Esaki ta hasié interesante. Hende di diferente kultura ta bin huntu pa hinka algu bunita den otro", segun un di e partisipantenan.