Kuarenta mucha di kriansa di Siloam Village Curaçao djasabra meinta 15 di sèptember a haña un dia inolvidabel seka e trahadónan hóben di e website kurasoleño thelongestwebsiteaddressoftheworld.com.

E muchanan di Siloam ta bini for di situashon doloroso i sin perspektivo pasobra nan famia i komunidat a laga nan na kaya pasobra nan ta hopi malu i den algun kaso asta terminal. Bep i Herman Gijsbers dia i nochi ta traha pa e muchanan aki na Siloam sin interes propio, pero no tin plaka pa hasi kos di grasia pa e muchanan.

Relato teribel
Raymonde (12) i Boy (14) Bongers a disidí pa huntu ku fanátiko di e website di obra karitativo duna e muchanan un dia inolvidabel. “Algun siman pasá nos a bishitá nan i e relatonan ku nos a tende ei tabata teribel. Herman ta konta ku un be a tira dos mucha den un saku di shushi na nan porta, despues ku hende riba kaya a hunga furbòl ku nan den e saku”, Raymonde ta konta. El a keda sin por drumi nochinan largu di tur kos ku el a mira i tende na Siloam. Boy espesialmente a kai na pena di un hobensito ku un ora pa otro por fayesé di enfermedat di kurason.

Strea pa un dia
“Pa sali keiru kualke dia pa nos ta masha normal, pero no pa e muchanan di Siloam pasobra no tin plaka pa esaki. Tin mucha ku pa luna mester di dos mil florin di remedi”, Boy ta konta. “Ta pései nos a disidí di laganan sinti nan mes un strea pa un dia.”

No a spar ni plaka ni esfuerso pa hiba e muchanan ku un partybus di Band’Abou pa Waaigat. Ei periodista lokal tabata warda nan, ku tabata hasi manera ta paparazzi nan ta, pa duna e muchanan e sintimentu ku nan ta strea di berdat. Despues den limo i hummer a hiba e muchanan Cinema’s na Otrobanda kaminda nan por a gosa di e sine Nemo na 3D.

“Loke nos a gusta mas tantu ta ku e muchanan a pasa asina bon. Henter ora nan tabata hari i grita, pa djis un ratu nan no tabata mustra malu.”

Hasi algu útil riba internet
Boy i Raymonde a haña e idea di lanta e website di obra karitativo despues ku nan mayornan a reklamá tokante e oranan interminabel ku e muchanan tabata pasa riba internet ta hunga wega. “Nan a duna nos orden pa pasa nos tempu riba internet ku algu útil na lugá di hunga wega. Asina e idea a lanta pa thelongestwebsiteadressoftheworld”, Raymonde ta konta.

“Kada post riba nos buki di wespet riba e site ta trese mas o ménos tres sèn.” Aktualmente tin un suma total di 14.735 dòler riba e site. Ku e plaka e dos rumannan a organisá diferente evento di grasia kaba pa mucha neglishá òf pober. “Pero konta ku esaki lo bira inolvidabel”, nan ta hari.

Mira aki bou e reportahe di potrèt di e dia, saká pa Bea Moedt