Personal di prizòn ta mashá prekupá pa nan seguridat. Esaki despues ku awe meinta un prizonero a tira un otro prizonero mata.

Rònt di dies or di meinta di repente tabatin pániko den blòk 4. Tur hende den bisendario a tende un tiru. Desena di wardadó di diferente departamento a kore bai e departamento di hòmber kamida nan a haña e kurpa sangrando di K.S. : a tir’é mata ku un pistol. Mes ora a arestá un prizonero. Tin bisá ku entretantu a aresta un di dos tambe.

K.S. tabata sinta un sentensia di 40 aña. Shete aña pasá e tabata den notisia pa motibu di benta di sentensia falsifiká. El a logra di gaña su ko-prizoneronan ku nan por a sali liber mas promé si nan paga un amiga di dje sumanan grandi di plaka.

E amiga tabata tuma e plaka sin hasi nada. E ekspektativa tabata ku e famianan ku a paga e suma lo no hasi nada pasobra tabata trata di komersio ilegal.
Pa personal di Sentro di Detenshon i Korekshon e tiroteo ta e di tantu insidente ku nan ta haña nan kuné. Ounke e personal di prizòn tabatin tur kos bou di kòntròl mes ora tabata opvio ku nan tabata hopi prekupá.

Limpiesa grandi
Dos aña pasá a limpia e prizòn ku masha presishon. Esaki tabata segun orden di e minister di Hustisia di e tempu ei Magali Jacoba pa motibu di un videoclip ku e prizoneronan a traha den e prizòn. A pone esaki riba YouTube. Den e clip e prizoneronan tabata reta un i tur pa bini ‘p’aden’.

E echo ku prizonero por a traha un videoclip i ku aparentemente nan tabata tin akseso liber na internet no a kai bon. Den e akshon di limpiesa aki a haña diferente telefon selular, laptop i otro artíkulo ‘luho’. Tambe a haña arma normal i improvisá. E akshon di limpiesa a resultá den un insurgensha chikí kaminda e prizoneronan kasi a basha blok 2 abou.

Kòntròl intensivo
For di e tempu ei a intensivá kòntròl na porta di prizòn. Ta kontrolá personal, bishitante i suministradó. Tòg a logra di drenta e prizòn ku un arma di kandela. Esaki ta loke tin e personal prekupá.