No ta solamente Kranshi ta muda bai e edifisio anterior di Sint Thomas College, sino tambe tres otro servisio i esei ta trese un ekonomisashon di sigur 300 mil florin pa aña, minister Carlos Monk (Planifikashon Gubernamental i Servisio, PS) ta bisa.

Anteriormente e siman aki Monk a haña hopi krítika –asta di gobernador di Kòrsou, manera a sali for di un karta ku a lèk – pasobra lo e kera muda Registro Sivil (Kranshi) for di un edifisio ku ta kosta 56 mil florin pa luna pa e edifisio di Sint Thomas ku ta kosta 125 mil florin pa luna.

Kuater servisio
“Nos ta muda Kranshi, Ofisina di Reibeweis, e Bentana di Pèrmit i Bentana di Informashon (e liña di informashon di gobièrnu) pa Sint Thomas. Na lugá di paga 1.291 mion florin e ora ei nos ta paga 960 mil na hür – ke men 331 mil ménos – pasobra mi a negoshá un hür di 80 mil florin pa luna den deliberashon ku Fundashon Sint Thomas College”, Monk ta bisa.

E minister no ta papia di e hür di 125 mil florin ku gobernador a menta. “Mi no ta duda outoridat di órgano demokrátiko ku ta pidimi splikashon” Monk ta bisa. El a bisa ku el a papia ku gobernador Frits Goedgedrag ‘resientemente’ i ku el a mustr’é e kòntrakt pa e hür di 80 mil florin ‘sin indeksashon di preis di hür’.

Seis luna
Den promé seis luna gobièrnu no tin nodi di paga hür. Nos a negoshá ku nos por haña seis luna pa drecha e edifisio – pa kumpli ku e kriterianan di seguridat pa maneho i entrega di pasport, por ehèmpel.

Ora e kontrakt di hür kaba aki dos aña, gobièrnu ta haña e opshon pa kumpra e edifisio. E invershonnan i e hür di 1.920 mion ku a paga e ora ei lo kita for di e suma di kompra. Monk ta kalkulá ku e edifisio bal un 3 pa 5 mion florin aktualmente, pero lo laga taks’é ora t’asina leu: ‘ta posibel ku e edifisio por bira propiedat di e pais pa un florin”.

Bùs chikí
Segun Monk e mudamentunan ta pas den e maneho di gobièrnu pa sentralisá servisionan i ofresé siudadano un servisio di ‘one stop window’. E falta di lugá pa parker pa bishitantenan di e kuater bentananan segun Monk no tin nodi di ta un problema. “Den vishon moderno di urbanisashon no sa parker pegá ku edifisio. Por usa bùs chikí pa e nesesidat di transporte di luga di parker mas leu pa e edifisio.”

Monk ta investigando ainda ta ken ta doñonan di e edifisio di Sint Thomas promé ku e firma e kòntrakt di 80 mil pa luna. “Mi no ta dil ku hende ku ta keda anónimo tras di un konstrukshon di fundashon.