Munisipio di Almere ke pa su servisionan enfoká mas riba Antianonan na e siudat. Antiano Edwina Molina, miembro di e konseho munisipal di Almere ta haña ku e enfoke ei mester a sosodé mashá dia. Tin ku aselerá e proseso pa asina e Antiano tin un dak riba su kabes i pan riba mesa.

Almere ta un di e asina yamá Antillianengemeenten, kaminda bastante Antiano ta biba. E siudat ta haña anualmente 200-mil euro di Reino pa atendé e problemátika di kriminalidat bou di hóbennan antiano.
'Mester aselerá e proseso pa yuda Antiano, ounke ku no por bisa ku e situashon di Antianonan na Almere ta dje alarmante ei', segun Edwina Molina.

Instansianan
Munisipio di Almere ta duna hopi sifra, den kua nan ta mustra ku e situashon di hóbennan antiano no ta bai hopi bon. Porfin instansianan ta bai sòru pa tin hende profeshonal pa atende ku Antiano. Edwina Molina ta puntra su mes dikon no ta tuma e Antiano na trabou. Lástimamente no ta skucha ora e puntra esaki.

Segun Molina tin un maneho pa baha kriminalidat di hóben antiano na Almere pero esaki ta kana poko poko. "Antianonan tabata mas bon representá na havo. Awor nan ta mas na vmbo", segun Edwina. E ta haña ku tin ku konsentrá tambe riba e Antiano ku no a stòp di bai skol i yuda nan sigui progresa.

Aselerá e proseso
E miembro di konseho di munisipio ta sigui bisa ku mayornan ta laga yu bini Hulanda sin ta bon prepará. E yunan ta keda serka ruman, bisiña o famia. Despues nan ta haña hopi problema i bai dualu riba kaya. "Gobièrnu mester negoshá bon ku Hulanda, mester aselerá e proseso pa yuda Antiano ku kas i kamber" asina Molina ta konkluí.