Ultimo lunanan ta opservando mas i mas UFO (Unidentified Flying Object o sea opheto buladó no-identifiká) den shelu na Sürnam. Hopi biá ta opservá nan na diferente lugá tambe. E kantidat di notifikashon ta asina tantu ku poko ten pasá a lanta un sentro di notifikashon di UFO na Paramaribo.

Un di e opservashonnan mas remarkabel ta esun fechá 19 di yüli 2009. E anochi ei tres UFO tabata bulando riba Paramaribo, kos ku mas hende a mira n'e momentu ei. Sham Binda tabata sintá ku algun turista den outo ora ku un di e mucha hòmbernan a mustra den direkshon di e lusnan. "E mucha a mira e lusnan move bisando ku ta UFO nan ta. Ami a kere ku ta wega e tabata hasi. Ta ora mi a hisa mi kara wak shelu, mi a mira un lus hel straño anto ora m'a sigui wak, m'a mira tres di nan", asina Binda ta konta.

E rayonan di lus tabata basta grandi i nan tabata bulando den formashon, segun Binda. El a logra saka un potrèt tambe. "Promé m'a mira un punta mashá chikí riba mi kámara, pero ta ora mi a poné riba kòmpiuter, m'a mira un opheto straño. Bo por mira kla kla ku no por ta un oroplanu."

MUST ta e promé sentro di notifikashon di UFO na Sürnam
Tanya Wijngaarde a lanta e promé sentro sürnam di notifikashon di UFO, entre otro pa motibu di e aviso di 19 di yüli. MUST, ku ta abreviashon di ‘Meldpunt UFO’s boven Surinaams Territorium’ (MUST) ta un sentro di notifikashon independiente. Su meta ta pa inventarisá notifikashon di fenómenonan aéreo straño riba Sürnam, i si ta posibel, investigá nan", asina Wijngaarde di.
“Ultimo dos luna a drenta sinku notifikashon. Despues ku e informashon drenta ta sigui un kòmbersashon ku e opservadó. Ora esei ta kla ta investigá tur posibel aklarashon koriente. Ta te ora no por splika un fenómeno mediante opheto òf fenómeno konosí kaba, por indik'é komo UFO", asina Wijngaarde ta bisa.
 

Tin mas kos entre shelu i tera ku nos no konosé
Binda ta konvensí ku tin mas kos entre shelu i tera ku nos no konosé. E no a duda niun momento so di loke el a mira. "Mi a haña ta tremendo pa mira ", asina Binda di.

Nota di Redakshon: pa un potrèt mas kla di e UFO, fabor sùrf bai wèpsait di Suriname di Wereldomroep! 

Skucha un entrevista di koresponsal Harmen Boerboom