Manera por a spera, minister Piet Hein Donner (Asuntunan Interno i Relashonnan di Reino) ta pasa pa Raad van State, komo susesor di Herman Tjeenk Willink den kalidat di visepresidente. Djabièrnè 16 di dezèmber, Konseho di Minister a finalisá postulashon ofishalmente pa nombramentu di Donner. Liesbeth Spies, miembro di partido CDA i diputado na provinsha Zuid-Holland, ta sigui Donner komo minister di Asuntunan Interno i di Relashonnan di Reino.

Minister plenipotensiario di Sint Maarten, Mathias Voges, ta lamentá baiment'i Donner. "Ta difísil pasobra nos gusta ku Donner i nos no sa kiko ta warda nos." E ta haña ku e èks minister ta un persona 'ku ta pensa huntu ku e islanan'. E minister plenipotensiario a ripará 'ku Donner ta realisá bentaha di bon koperashon ku e islanan'.

Sera konosí lihé
E no konosé Liesbeth Spies, susesor di Piet Hein Donner: "Nos ta spera k'e ta sigui ku liña di Donner, i ku e lo bishitá e islanan lihé pa sera konosí ku e gabinetenan." Ofishalmente kambio di mandatario no tin mester di hasi diferensha pa progreso dje dòshei: "Mi ta asumí ku e susesor lo sigui e mes maneho."

E minister plenipotensiario di Sint Maarten ta positivo sí ku posishon nobo di Donner komo visepresidente di Raad van State, o sea Konseho di Estado: "Komo ku e konosé e islanan bon, mi ta kere ku esaki ta un bentaha pa nos." Voges ta mustra tambe rib'e bon relashon ku Donner tin ku Dennis Richardson, representante di Sint Maarten den Konseho di Estado.

Minister plenipotensiario Sheldry Osepa di Kòrsou ta kere ku Donner 'lo hasi falta'. E ta yama Donner 'e nèstor di Konseho di Minister di Reino' i e ta gaba su eksperiensha amplio riba terenu hurídiko i polítiko. E kos ei tin su banda peligroso tambe, segun Osepa: "Bo no mester duna un dede asina asina, sino bo ta kapa'i pèrdè pia ku brasa ku tur."

Polítiko di puro sepa
Ku esei Osepa ke bisa ku Donner no ta ekipá ku eksperiensha riba terenu di hurisdikshon so, sino ku e ta un 'polítiko di puro sepa'. E minister plenipotensiario ta kere e echo, ku Donner konosé e islanan bon, ta un bentaha indiskutibel p'e funshon nobo serka Raad van de State. "E sa di e delikadesanan, e 'ups and downs' den e relashonnan den seno di reino hulandes."

For di 1997, Tjeenk Willink tabata visepresidente di Raad van State, e órgano di konsulta mas importante di gabinete hulandes. Di yüli 2002 te 21 di sèptèmber 2006, Donner tabata minister di Hustisia den tres gabinete ku promé minister Jan Peter Balkenende (CDA) na kabes. Na 2006 Donner a baha pa motibu dje kandela na kompleho di detenshon na Schiphol-oost. Den e di kuater gabinete Balkenende, e tabata minister di Asuntunan Sosial. Aña pasá òktober, Donner a tuma asiento komo minister di Asuntunan Interno den e gabinete minoritario di VVD i CDA, ku sosten di partner tolerante PVV.

Djabièrnè mèrdia Donner a pasa su tareanan di minister di Asuntunan Interno pa e mandatario nobo den persona di Liesbeth Spies. Esaki a tuma lugá den Thorbeckezaal di ministerio di Asuntunan Interno na Den Haag.

'I Relashonnan di Reino'
Spies ta konta ku ta algu 'sumamente straño pa sali kas mainta komo diputado di Zuid-Holland i regresá anochi komo minister di Asuntunan Interno'. "I di Relashonnan di Reino!'', Donner a kore añadí. Spies no konosé e islanan den Karibe ainda. El a profundisá den dokumentonan di bibienda i di asuntunan interno, respektivamente komo diputado i komo parlamentario.

Pa Spies, e nombramentu komo minister ta un gran onor, pero tambe un responsabilidat grandi, asina el a bisa. E ta kontentu ku minister Gerd Leers (Imigrashon i Asilo) ta tuma e pakete di integrashon ku Donner tabatin. E ta kombiná mió ku e kartera eksistente di Leers. Spies 'a pens'é bon' último tempu, asina e ta konta. Pero 'poko poko, visepromé minister Maxime Verhagen a hasi un apelashon sumamente konvinsente i énfátiko riba dje' pa dal bai ku e puesto. "E sa ta ekstraordinariamente simpátiko i tenas", asina Spies ta deskribí e diferente kòmbersashonnan ku el a hiba ku e mandatario, kopartidario di CDA.

Pens'é bon
Spies mester a pens'é bon sí promé, relashoná tambe ku su famia. É ta di opinion ku bon mirá su tempu komo diputado tabata muchu breve. Pero al fin i al kabo, e echo ku el a aseptá e puesto, ta un desishon ku e mes a tuma ku konvikshon, segun e minister nobo di Asuntunan Interno.

Di 2002 te aña pasá, Spies tabata miembro di Tweede Kamer, e último añanan komo visepresidente di frakshon. E tabata okupá ku entre otro renobashon gubernamental, medio ambiente i Kas Real. For di aprel dje aña akí, Spies a desplegá puesto di diputado na Zuid-Holland. Aya e tabata responsabel pa entre otro espasio urbano i bibienda.