Minister plenipotensiario Sheldry Osepa ta konsiente ku e mester di yunan di tera pa kumpli ku e reto di konstrukshon di Kas di Kòrsou na Hulanda. 'Huntu nos por logra', asina Osepa a remarká despues di un enkuentro ku komunidat kurasoleño na Den Bosch.

Na e okashon ei promé minister Gerrit Schotte, kende tambe a presensiá e enkuentro, a splika públiko kon e ta mira papel di Kas di Kòrsou. E kas mester duna informashon na esnan ku ke remigrá tokante 'kiko ta pasando na Kòrsou, kiko ta e oportunidatnan' i informá i guia e hóben ku ta bini Hulanda logra 'un kombibensia apropiá.

Reto fèrfelu
Papiando di su enkargo Osepa a komentá ku 'e loke nos tin nos dilanti ta grandi'. Pero en bista di e entusiasmo ku el a topa durante e enkuentro na Den Bosch i algun ora promé na Den Helder, e tin fe ku kosnan lo kana bon. Na Den Helder Osepa a topa yunan di tera ku a enfrentá sierto reto fèrfelu na Hulanda, ku nan mes a logra di superá. El a keda impreshoná ku un empresario hóben na e siudat. 'Tin yu di Kòrsou eksitoso na Hulanda.' E minister plenipotensiario ta kere ku si por logra pasa e konosementu ei...e komunidat di yu di Kòrsou por kuminsá di ta ekselente.' Di e forma ei Osepa ta kere 'ku nos lo tin ménos ku hende tin kos di bisa nos.'
                                                                       
Serka di pueblo
Funshonamentu di Kas di kòrsou ta kuadra ku meta di su gobièrnu pa goberná mas serka di pueblo, asina Schotte a splika. Den e enkuentro ku yu di Kõrsou na Den Bosch, e promé minister a skohe pa interkambio ku públiko presente tokante e forma ku Kas di Korsou ta bai funshoná den futuro. El a bisa di a opta pa un interkambio ku públiko tokante futuro di Kas di Kòrsou na lugá di splika esnan presente kon e nuebe ministerionan nobo ta bai funshoná.

Minister plenipotensiario di Kòrsou, Sheldry Osepa-Scarlet Windster a papia kune