Minister di Finansa George Jamaloodin djárason anochi 18 di aprel a denunsiá Emsley Tromp, presidente-direktor di Banko Sentral di Kòrsou i Sint Maarten (CBCS).

Jamaloodin no a duna mashá detaye di e kontenido di e denunsio. Sí el a bisa ku un ke otro tin di haber ku un reunion di Konseho di Komisario (RvC) di CBCS, ku mester tuma lugá djasabra awó.

E reunion aki, ku miembronan di RvC di Sint Maarten a pidi, ta pa aprobá desishon posibelmente ilegal, establesé den notula anterior. Esaki minister Jamaloodin ta bisa den e transmishon di notisia di TeleCuraçao i CBA Television. E tabata kompaña pa landsadvocaat Chester Peterson.

Mas denunsio
Jamaloodin ta indiká ku lo sigui mas denunsio. “Mayan lo sigui un di dos denunsio i posibelmente lo bini un di tres tambe. E komisarionan di Sint Maarten a trese komo punto di agènda legalisashon di e fiansa di bono pa e kompania di haf di Sint Maarten i e kuenta anual ku ta trese hopi pregunta. Segun lei bo ta kómplise si bo sa ku algu ta robes i bo trata di legalisá esaki tòg. E ora ei mi ta karga bo responsabel penalmente.”

Segun e korant ‘Amigoe’ e miembronan di RvC di Kòrsou a bisa ku nan lo no bini e reunion di djasabra awó. Jamaloodin ta spera ku e di shete miembrodi RvC - ku a kaba di nombra – lo vota kontra den e reunion.

Deskonfiansa
Minister di Finansa a ekspresá su asombro ku Tromp, no opstante tur akusashon di último tempu, mes no ta kita. “Ta reina deskonfiansa entre gobièrnu di Kòrsou i Tromp. E no por kana drenta den niun instansha di gobièrnu. Ta reina deskonfiansa entre RvC di Kòrsou i Tromp. Ta reina deskonfiansa entre Ministerio Públiko hulandes i Tromp. Su integridat ta difamá. Si bo ke drecha bo nòmber bo mester saka bo konklushon i duna oportunidat pa hasi investigashon.”

Segun Jamaloodin Tromp no ke bai pasobra e ‘tin kos di skonde’. Jamaloodin ta bisa ku el a tende ku mashin di kibra papel ta trahando 24 ora pa dia pa destruí dokumento. Ademas e kièr sa ku a remplasá tur mashin di kopia na Banko Sentral.