Minister Arthur Dowers di Hustisia i di Enseñansa di Aruba a klousurá su bishita di kortesia na Hulanda. E ta satisfecho ku e manera ku kos a bai den esun siman i mei ku el a pasa na Tera Friu. E minister arubano ta di opinion ku e bishita no tabata solamente pa sera konosí ku mandatario i instanshanan na Hulanda.

Dowers a sera konosí ku su kolega ulandes Ernst Hirsch Ballin, ku sekretario di estado Nebahat Albayrak i ku algun otro mandatario. Fuera di esei e minister a bishitá un kantidat di institushon, manera Schiphol i e akademia di polis na Apeldoorn. E tabatin un enkuentro tambe ku studiante arubano na Hulanda.

Minister Arthur Dowers ta sumamente kontentu ku su bishita na Hulanda. El a ripará ku tin basta entusiasmo pa koperá ku otro. E minister ta mira un relashon ku Antia tambe, den e sentido ku Hulanda ta kuminsá komprondé ku koperashon ta benefisiá un i tur, aún mas awor ku e proseso di desmantelashon i e struktura nobo di Reino ta den porta.

Apresio
Gabinete Eman, ku a kaba di sinta na Aruba ta konsiderá un bon relashon ku Hulanda komo algu indispensabel, asina Dowers a konfirmá, i ambos pais ten e mes pensamentu.

Logro konkreto
Aruba i Hulanda ta bai intensivá nan relashon di koperashon riba tereno di hustisia i di enseñansa. Pais Aruba lo haña asistensha pa subi nivel di maneho di institutonan penitensiario. Lo interkambiá di idea ku institushonnan hulandes pa kombatí analfabetismo. Esakinan ta algun di e logronan konkreto di e bishita di trabou di minister Arthur Dowers na Hulanda.