Minister plenipotensiario Sheldrey Osepa no ta kontentu ku pa motibu di e reglanan na vigor e no por pone su mes elegibel pa MFK den elekshon di 19 di òktober. Un plan ba pai wes pa logra esaki tòg, despues di deliberashon ku su partido el a legumai.

“Mi ta haña masha lástima, mi tabatin gana di para riba lista, ma loke no por, no por. Lo mi usa tur otro manera pa sostené mi partido tòg”, e minister ku ta representá Kòrsou na Hulanda ta reakshoná.

Osepa, meskos ku su kopartidario i bosero di Curaçaohuis Ramon Yung, i su kolega den koalishon i remplasadó Humphrey Senior (MAN), no por pone su mes eligibel pasobra e no ta inskribí den registro sivil di Kòrsou. Pa tur hende ku ke vota na Kòrsou òf ku ke pone nan mes elegibel ta konta ku nan mester ta inskribí den registro sivil di e isla i mester biba riba e isla. Esaki ta stipulá den e reglamentu di vota di Kòrsou.

Protesta
“Nos a trata di entamá un kaso kontra e regla aki sí, pero despues di deliberashon mi a disidí di no hasié pasobra no tin basta tempu”, segun Osepa. Huntu ku su partido via wes e ker a konvensé konseho di vota pa tene kuenta ku su ‘situashon ekstraordinario pasobra ta na nòmber di pais Kòrsou e ta inskribí na Hulanda, ke men e no por a skohe otro’.

“Ta asina e kos ta reglá na Kòrsou, lo mi mester aseptá esei. Tur sosten ku mi tin den komunidat lo mi usa den e tempu binidero pa sostené e kabesante di lista.” Osepa ta enfatisá ku e mes lo paga pa e bini Kòrsou pa bin yuda ku kampaña. “Mi no ke pa hende kere ku ta ku plaka di komunidat mi ta bula bai bini pa elekshon.”

Futuro
Hurídikamente ta posibel ku Osepa lo bolbe bèk komo minister plenipotensiario si su partido despues di elekshon ta den koalishon atrobe i logra di negoshá e puesto. “Bia pasá tampoko mi no tabata riba lista, ke men lo no ta un problema si e situashon okurí.” Pero ta di puntra si Osepa ke e puesto bèk. “Esaki ta algu ku mi mester palabrá ku mi famia, pasobra no ta un tarea fasil i e posishon ta pidi hopi di bo.”