Si bo ke trese kambio 'e mihó lugá pa hasi esei ta riba e stulnan blou di Tweede Kamer', asina rubiano Nadya van Putten ta motivá su kandidatura pa GroenLinks pa elekshon parlamentario di 9 di yúni. Kongreso di GroenLinks a disidí ayera ku van Putten ta haña puesto 19 riba lista di e partido. E puesto riba lista ta di ménos importansha pa Nadya. "Mi ta un kampañadó. Mi ke ta esun ku ta drenta riba su mes forsa."

For di tempu ku Van Putten a bin biba na Hulanda el a disidí ku e ke hasi algu pa pueblo. E ta konsiderá polítika komo 'vehíkulo pa uza pa mehoransa den su pais.' Van Putten tin basta eksperensha di trabou ku temanan di aktualidat manera integrashon, emansipashon. Den su trabou el a topa ku hopi kos ku e no por a kambia. E ora ei el a puntra su mes si e tin di sigui traha asina òf purba trese un kambio. E eskoho pa kambio a resultá den su kandidatura pa lista di GroenLinks.

Pueblo mi tras
Van Putten ta masha kontentu ku e ta un di e 33 kandidato pa subi lista. "Mas ku 230 hende a purba di bai riba lista i ami ta un di e lucky few." E ta haña importante pa mustra ku e tin su hendenan ku ta respald'é. "Ami tin pueblo mi tras."

Si Nadya van Putten keda elegí e ta marka historia komo e promé dama rubiano ku ta drenta parlamento hulandes. P'e ta difísil pa imaginá su mes kon lo e reakshoná si esei bira realidat. Pa awor su prioridat ta pa e logra bastante voto. "Ami ke traha pa nos pueblo. Promé mi tin ku yega. Una bes mi tei nos ta bai hasi nos kosnan tambe."

Enfoke riba antiano i rubiano
Van Putten tin situashon di antiano i rubiano na Hulanda masha na pechu. "Nos tur sa kon ta wak pueblo antiano na Hulanda. Kuantu problema nos tinm ku kriminalidat." E ta kere ku su eksperensha di trabou por yud'é pa buska solushon pa problema manera esun di hóbennan ku no ta kaba skol. Pa logra esaki mester di un koalishon progresivo sí, asina van Putten ta komentá.

Skucha Nadya van Putten, kandidato rubiano pa partido Groenlinks