Eks diputado Zita Jesus-Leito ta keda para tras di e areglo di penshun pa miembronan di Konseho Insular di Kòrsou. Den un entrevista eksklusivo ku Wereldormoep el a bisa ku e informashon ku komunidat a haña no ta kuadra ku realidat. E èks diputado a bisa ku bon mirá a yega lat na e areglo. E mester a bini for di aña 2000. Mas aleu Jesus-Leito a bisa ku no mester saka e asunto for di su konteksto.

E krítika ku a surgi riba e areglo di penshun 'tremendo', ku e anterior Konseho Insular di Kòrsou a aprobá riba último dia di periodo di gobernashon no ta hustu. Eks diputado Zita Jesus-Leïto ta sigui respaldá e areglo di penshun tan kontrovershal. For di 2000 e miembronan di konseho ta wardando riba un areglo di penshun na drechi.

Konmoshon sosial
E èks diputado ku tabata responsabel p'e areglo, te awor no a reakshoná riba tur e konmoshon ku a surgi enkuanto e areglo demasiado rèimu na pareser di hopi hende.

Gobernador Frits Goedgedrag a kanselá e asuntu i awor ta investigando e 'pensioenverordening' pa wak si e ta basá riba bon gobernashon. Jesus-Leito no por kab'i komprondé e konmoshon den komunidat: "No a konta henter e istoria."

Zita Jesus-Leïto (PAR) ta bisa ku miembronan di konseho ku ta traha fultaim ta pagando  años kaba pa nan penshun sin risibí nada p'e. "Tin hopi informashon robes riba e areglo." Tin un areglo kaba pa miembronan di konseho ku ta traha partaim. "Esei t'e mes areglo. Uniko kos ta ku ta trata di 90 porshento di e kompensashon." E miembronan fultaim lo a haña 70 porshento. Sparmentu pa penshun (12 aña) i e edat di derechi di baha ku penshun (50) ta igual pa ambos grupo. Pa miembronan di Staten i pa mandatarionan tin un areglo di penshun. No a inkluí e konteksto ei den e diskushon, segun Jesus-Leito.

Argumentashon
Anteriormente gobernador a eliminá e areglo komo ku e no tabata bon argumentá. "Awor sí e tei." E èks diputado ta remarká ku niun miembro di Konseho Insular no ta alkansá e 12 añanan, kontá for di 2000, ya ku lo disolvé e Konseho. Jesus-Leito mes no ta kai ètòl bou di e areglo, asina ta ku e no ta benefisi'é personalmente. "Ta trata di e prinsipio di igualdat."

Jesus-Leito ta konfia ku gobernador lo pèrmití a areglo ainda. "E hendenan aki a paga prima. E no ta kosta miones, a kalkul'é riba 1,2 mion di florin." E Kolegio Insular bieu a disidí pa no lagu'é pa e susesornan, komo ku mester kaba di atendéle promé ku 10-10-10. "Tabatin hopi preshon, pasó e or'ei no ta eksistí miembro di Konseho Insular mas, sino di Staten."