Michael Jackson, e kantante di músika pòp a fayesé na Los Angeles. Dòkter forense a konfirmá su morto despues di outopsia. Jackson a bai sosegá na edat di 50 aña.

Kurason di Jackson a para i a hib'é hòspital urgentemente. Segun informenan ku a drenta e no tabata hala rosea mas ora ku ambulans a pasa busk'é na kas. No a determiná e kousa di morto ofisial ainda. Rumor ta kore ku el a kometé suisidio.

Prinsipio di yüni vários media internashonal a notifiká ku estado di salú di e kantante di músika popular tin hende prekupá. Segun tin papiá e tabata pisa ménos ku 57 kilo. Resientemente a konstatá kánser di kueru serka e kantante.

Nèt despues di hopi aña Michael Jackson lo a kuminsá presentá su shonan musikal atrobe. A plania un serie di konsierto di The King of Pop pa otro luna na Londen.

E disko mió bendí
Na mucha Michael Jackson tabata konosí komo miembro di The Jackson 5. Huntu ku su ruman hòmbernan el a produsí hitnan famoso manera I want you back, ABC i I'll be there. Na añanan '80 i '90 Jackson tabata un di e streanan di pòp mas grandi na mundu ku hitnan manera Thriller. Kétubai Thriller ta e disko mió bendí den istoria.

Despues di tempu Jackson no a logra igualá e instantenan di éksito akí mas.
Na 2005 a apsolv'é di abusu di mucha despues di un proseso sonado, pero su karera musikal a deteriorá, loke konsekuentemente a kondusí na debe grandi. Apénas tabata tum'é na serio (Wacko Jacko-red), esaki debí tambe na su kondukta strabagante. Amantenan di su músika sí a keda fiel n'e.

Artistanan famoso a keda pasmá
Artista i demas personahe famoso rònt mundu a keda pasmá ku fayesementu di Jackson. Madonna, un di e superkantantenan ta bisa ku músika a pèrdè 'un di e grandinan'. "Mi no por stòp di yora ku e notisia tristu akí. Su músika lo keda eksistí pa semper", segun Madonna.

Quincy Jones, e produsente di músika ku a yuda Michael Jackson ku Thriller i Off the Wall: "Awe mi a pèrdè mi ruman chikí, parti di mi alma a bai kune."

Lisa Marie Presley, yu muhé di difuntu Elvis Presley ku Jackson a yega di kasa kune: "Mi ta mashá tristu i konfundí ku tur sorto di emoshon. E kos akí t'un pèrdida asina grandi riba asina tantu nivel, ku mi no tin palabra p'e."

Sheryl Crow ku a kuminsá su karera komo integrante di koro pa konsiertonan di Michael Jackson: "Promé m'a kere ku kisas el a simulá su morto komo skapatorio."

Rònt mundu ta lamentá morto di Michael Jackson. Tur kaminda su fènnan a keda babuká. Jackson tabata na punto di start su promé gira den basta aña, ku sinkuenta konsierto.

Izaline Calister
E kantante antiano Izaline Calister ta konta for di Israel, kaminda e tei pa presentashon, ku dos or di mardugá, ora el a yega su kamber di hotèl, el a tende di morto di Michael Jackson. "Awe meinta ora m'a lanta m'a pensa: mester tabata un soño, e asuntu ta ireal." Tempu di Thriller e tabata un gran fanátiko: "Tabata é soundtrack di mi hubentut."

Musikalmente Jackson no tabatin gran influensha riba Calister. Ta é por ke sí ku Izaline a kuminsá skucha musika pòp, pasobra promé ku esei e tabata skucha sobretodo músika latino. Durante su presentashon di djabièrnè awor sigur sigur lo e para ketu na Israel na okashon di morto di Michael Jackson. "E kantika Forsa ta trata di forsa di paden. Esei lo mi kanta pa su famia i pa tur hende ku ta sinti fèrdrit pa motibu di fayesementu di e gran artista aki."

Nònstòp Michael Jackson
E emisora di radio online Radio Fruz ta tokando músika di Michael Jackson so for di ora ku e notisia a drenta i lo sigui toka nònstòp te ku djadumingu 28 di yüni. "Ainda mi no por aseptá e kos", asina Akil Quirindongo, produsente di programa ta bisa despues di un anochi sin por drumi. "Lo dura poko promé ku indústria di músika realisá kiko a sosodé. E genio musikal Michael Jackson tambe tabatin hopi influensha na Antia i tur kaminda na mundu, asina Quirindongo ta pensa.

Imitadó Daimyo
Daimyo ya tin binti aña ta imitá Michael Jackson pero e ta enfatisá ku esaki ta e kaso solamente riba podio. "Ora mi kana riba kaya, mi ke ta mi mes." Aktualmente tur sorto di medio di komunikashon na Alemania i Hulanda ta buska kontakto kune pa bisa algu di Michael Jackson.

Ounke ku e no a nase ku fam di Jackson, e ta karga e nòmber ofishalmente awor i ku pèrmit di Joe Jackson, tata di Michael. E echo ku su ídolo a fayesé no ke men ku su karera a stanka. "Hopi aña pasa mi a bisa kaba: dia Michael no tei mas, te ora ei kos ta bai sinta."