Levi Silvanie ta kantante i ta doño di su mes kompania di disko na Den Haag. Silvanie a disidi di ta diferente di loke e tabata promé.

Kontenido dje kantika 'Djis mi mes' ta sali for di e punto di bista ku un persona mester konosé su mes bon i ta su mes. Tambe Silvanie ta di idea ku bo mester ta franko ku bo mes i lucha pa bo soñonan bira realidat. Den e obra artístiko dje kurasoleño por skucha sintimentu, vishon i metanan. Silvanie ke purba di influenshá otronan na un manera positivo.

'Turning point'
Ta remarkabel kon madurá Silvanie di binti tres aña (yan. 2011) ta papia. Esaki no tabata semper e kaso. Na 2004 Silvanie a bira konsiente ku semper e tabata tin un posishon di influenshá den un otro hende su bida. "No ta semper mi tabata manera mi ta aki, ta papia manera mi ta papia awor aki." Silvanie ta splika ku den su periodo di püber ora e tabata faya e tabata para habrí un dado momentu p'e siña djesakinan. Esaki a poné kambia i ta manera e ta awe.

Rebelde
Na skol Silvanie tabata pèrkurá pa kibra regla i alabes mustra ku esakinan no por sòru pa tene tur kos bo'i kontròl. Levi Silvanie ta splika ku e ekspektativanan kon pa biba ehemplar tabata hopi haltu riba dje i su mayornan, Duo Gleva. "Ami semper a haña hopi difísil tin ku biba un manera pasombra mi ta yu di." Silvanie ta sigui konta ku serka un par di hende e ta konosí komo un tiki rebelde. E artista ta splika ku semper e kier tabata djis su mes. "Mi no ke ta djis bon paso mi ta yu di, pero mi ke ta bon paso mi ta skohe di ta bon."

'Different'
Silvanie ku konosé su mes bon ta trahando e aña akí riba su disko kompakto ku ta hiba e nòmber 'Different'. "Mi por ta hopi diferente kos, pero n'e momentu ku mi skohe pa tur loke mi ta mihó den dje, mi ta pará den posishon mas mihó den bida". E kantante ta sigui splika ku no solamente e ke ta otro pa ku su bida, pero e ke ta diferente tambe den su músika i den tur kos k'e hasi. Silvanie ke usa su influensha na un manera aún mas positivo.