'Hustisia den e kaso di abuzu seksual di Iglesia Katóliko', esei a motivá Ad di 58 aña pa konta di su eksperensha ku abuzu seksual na Kòrsou na kabamentu di añanan '50. Ad ta konta di un insidente ku un frater na un skol básiko na Otrabanda. E frater a kohe man di e mucha tene i poné meimei di pia di e adulto. E siman akí Ad a konta su historia den 'Een Vandaag' na televishon hulandes. 'Un peso a kita for di mi' asina Ad ta deskribí su sintimentu despues ku el a revelá e insidente ku a torment'é pa años.

Tempu ku e insidente a tuma lugá Ad tabatin mas o ménos ocho aña. Ad ta konta di un frater amabel ku tabatin na su skol. E frater akí tabatin kustumber di tene man di mucha, porehèmpel ora kana bai outo. 'Den e tenementu di man ei, frater a kue mi man pon'é mei mei di su pia. Komo mucha bo ta sinti ku e kos ei no ta bon.

Sla na orea
El a puntra dikon frater a hasi e kos ei. Pero e no a haña kontesta. E frater a dal e duru na su orea, i sanger a kuminsá basha. Ora Ad su tata a bin buska e mucha na skol, el a puntra e yu ta kiko a pasa. E yu a bisa ku ta frater a dal e.'

'Mi no a konta mi tata sí loke a sosodé. Mi no a tribi di hasi esei. E tempu ei padernan tabata santu.' Tata di Ad a bai informá na skol ta kiko a sosodé, nan a bis'é ku e yu a hasi kos di mala mucha. Ku ta p'esei el a haña sla. Su siguiente siman e frater no a bin skol mas. 'Mi tabata kontentu ku e no a bini skol mas.'

Fondo pa víktima
Ad ta konta ku unabes el a ripará kuantu hende ta revelando nan eksperensha ku abuzu seksual di Iglesia Katóliko, el a disidí ku e tambe ta bai konta su storia despues di tantu aña. 'Mi ke hustisia, pa Iglesia Katóliko drecha e kos akí. Mi a spanta ora m'a ripará ku mi no ta e úniko víktima.'

'Si bai eksihí indemnisashon di Iglesia Katolíko, por dura añanan largu promé ku bo haña un depchi'. Ta p'esei Ad ta sugerí pa mihó Iglesia pone un fondo di algun mion disponibel. E fondo ei ta pa yuda mucha na Hulanda i Antia ku ta víktima di abuzu i maltrato.

Mèldu bo kaso
Despues di transmishon, un dama a tuma kontakto ku Ad i a kont'é ku e tambe tabatin eksperensha ku abuzu seksual na Kòrsou. Ad ta rekomendá tur víktima pa nan konta loke a pasa ku nan. El a sinti su mes masha aliviá ku despues di tantu tempu el a disidí di konta su storia.

Skucha Désirée Martis den un entrivista ku Ad